بەنداوی خنس سەرڕێژی کرد

بەنداوی خنس کە دووەمین گەورە بەنداوی پارێزگای دهۆکە لەگەڵ ئەم شەپۆلە بەفر و بارانەی ئەم دوایەی هەرێمی کوردستانی گرتووەتەوە، سەرڕێژی کرد.

بە گوێرەی تۆمارەکانی بەڕێوبەرایەتی گشتیی کەشناسی و بوومەلەرزەزانی هەرێمی کوردستان لە 24 کاتژمێری ڕابردوودا 24 ملم باران باریوە، بەنداوی خنس لە کابینەی نۆیەمی حکوومەتی هەرێمی کوردستان لە ساڵی 2021 دەست بەجێبەجێکردنی کرا و لە ساڵی 2022 تەواو کرا، بەنداوەکە توانای گلدانەوەی حەوت ملیۆن مەتر سێجا ئاوی هەیە و گرنگی بۆ كەرتی كشتوكاڵ، سامانی ئاژەڵ، كەرتی گەشتوگوزاری و ئاوی ژێر زەوی هەیە.

بەنداوەکە لە جۆری خاکییە و دەکەوێتە سنووری قەزای شێخان لە پارێزگای دهۆك، بەرزییەکەی 34.5 مەتر و درێژییەکەشی 195 مەترە، دەرچەی ئاودەرەكەشی دوو بۆریی تیرە 90 و 50 سانتیمەتریین.

بە گوێرەی بەڵگەنامەکانی فەرمانگەی میدیا و زانیاری، تێچووی ئەم بەنداوە نۆ ملیار و 218 ملیۆن 486 هەزار و 750 دیناربووە، لە ڕووی کشتوکاڵییەوە زیاتر لە 12 گوند دەکەونە سەر ڕێڕەوی ئاوەڕۆی بەندوەکە و سوودی لێوەردەگرن.

هەروەها ئامانجێکی دیکەی بەنداوی خنس، بایەخدانە بە کەرتی گەشتیاریی لە سنووری شێخان و پارێزگای دهۆک.

ئێرە کوردستانە؛ لە ئاسمانەوە دیمەنی سەرڕێژبوونی بەنداوی خنس ببینە..
ڤیدیۆ؛ ئیسلام هیرو - کوردستان24 pic.twitter.com/slBVSLOg6K

— Kurdistan24 (@kurdistan24tv) January 2, 2026