نەمسا: هەماهەنگیمان لەگەڵ هەرێمی کوردستان نموونەیەکی زیندووی سەرکەوتنە لە پرسی کۆچدا
ڕاوێژکاری کۆماری نەمسا، ستایشی ڕۆڵی حکوومەتی هەرێمی کوردستان دەکات و وەک هاوبەشێکی کارا و جێی متمانە لە پرسی کۆچ و پاراستنی ئاسایشدا. هاوکات پابەندبوونی خۆی بۆ پەرەپێدانی پەیوەندییە ئابووری و ئەمنییەکان لەگەڵ هەرێم دووپات دەکاتەوە.
کریستیان شتۆکەر، ڕاوێژکاری کۆماری نەمسا، دوای ئەوەی لەگەڵ مەسرور بارزانی، سەرۆکی حکوومەتی هەرێمی کوردستان، لە داڤۆس کۆبووەوە، پەیامێکی لە هەژماری خۆی لە تۆڕی کۆمەڵایەتیی (ئێکس) بڵاو کردەوە.
ڕاوێژکاری کۆماری نەمسا، جەختی لەوە کردەوە کە بۆ سەرخستنی سیاسەتێکی کاریگەریی کۆچ، بوونی هاوبەشی جێی متمانە مەرجێکی بنەڕەتییە. لەو چوارچێوەیەشدا، ئاماژەی بەوە داوە کە هەماهەنگییەکانیان لەگەڵ هەرێمی کوردستان، نموونەیەکی بەهێز و زیندووی ئەو جۆرە هاوبەشییە سەرکەوتووانەیە، بە تایبەتی لە پرسەکانی گەڕاندنەوە و وەرگرتنەوەی کۆچبەراندا.
باسی لەوەش کرد، نەمسا بە بایەخەوە دەڕوانێتە ئەو هاوکارییە بونیاتنەر و جێی متمانەیەی کە لەگەڵ حکوومەتی هەرێمی کوردستان هەیەتی.
کریستیان شتۆکەر، لە بەشێکی پەیامەکەیدا سوپاس و پێزانینی تایبەتی، ئاراستەی مەسرور بارزانی، سەرۆکی حکوومەتی هەرێمی کوردستان کرد، بۆ ئەو هاوکارییە بەرهەمدارەی کە لە نێوانیاندا هەیە.
هاوکات ڕاوێژکاری کۆماری نەمسا، پابەندبوونی تەواوی وڵاتەکەی بۆ برەودان بە هاوبەشییەکی ستراتیژی کە سێکتەرە گرنگەکانی وەک بەڕێوەبردنی کۆچ، ئاسایش و پەرەپێدانی ئابووری لەخۆ دەگرێت دووپات کردووەتەوە.
An effective migration policy requires reliable partners in countries of origin.
— Christian Stocker (@_CStocker) January 20, 2026
Cooperation with the Kurdistan Region of Iraq is a strong example of how such partnerships — including on returns and readmission — can work in practice.
Iraq serves as a role model for stability… pic.twitter.com/5QiV3hZgmo