کەمپەینی هونەرمەندانی شاری هەولێر بۆ پشتیوانیکردنی ڕۆژئاوای کوردستان دەستی پێکرد

پارێزگای هەولێر، بە هاوکاری بەڕێوەبەرایەتی ڕۆشنبیری و هونەری هەولێر، کەمپەینی هونەرمەندانی شاری هەولێری بۆ پشتیوانیکردنی ڕۆژئاوای کوردستان دەستی پێکرد و بۆ ماوەی چەند ڕۆژێک بەردەوام دەبێت.

ئەمڕۆ شەممە، 24ی کانوونی دووەمی 2026، هیوا سوعاد، سەرۆکی سەندیکای هونەرمەندانی کوردستان-لقی هەولێر، دەربارەی بانگەوازی هونەرمەندانی شاری هەولێر بۆ پشتیوانیکردنی ڕۆژئاوای کوردستان، بە کوردستان24ی ڕاگەیاند:  ئێمە وەکو هونەرمەندانی شاری هەولێر، هاوکارییەکانمان دەبەینە ئەو کەمپینەی کە پارێزگای هەولێر ڕایگەیاندووە، وەکو هەموو جارێک چینی هونەرمەندان بەشێکی کاریگەری کۆمەڵگەن و لە خۆشی و ناۆشییەکاندا لەگەڵ میللەتەکەی خۆیدایە و هەرگیز بە تەنیا بەجێیان ناهێڵن، ئەوەی هەمانە بەدڵ و بەگیان بەشدار دەبین لەو هاوکارییە بۆ برایانمان لە ڕۆژئاوای کوردستان.

هیوا سوعاد گوتیشی: جگە لە هونەرمەندانی شاری هەولێر، دڵنیام هونەرمەندانی شار و شارۆچکەکانی تریش، چ بە کاری هونەری یاخود بە پارە و کەل و پەل بەشدار دەبن لەو کەمپەینە، ڕۆڵی هونەرمەندانی کوردستان لەهەموو ئەو ناخۆشییەکاندا کە بەسەر میللەتی کورد دێت هەردەم باش بووە، ئەوە یەکەمجار نیە، هونەرمەندان بەشدار دەبن لەو هاوکارییە و ڕۆڵی زۆر کاریگەر دەبینن و هاوکارییەکانیش بەردەوامییان دەبێت.

جێگەی ئاماژەیە، کەمپەینی هونەرمەندانی شاری هەولێر، بۆ پشتیوانیکردنی ڕۆژئاوای کوردستان، لە لقی هەولێری سەندیکای هونەرمەندانی کوردستان بەڕێوەچوو و ماوەی چەند ڕۆژێک بەردەوام دەبێت.

هەر لەمبارەیەوە، سیروان عوسمان، بەڕێوەبەری گشتی ڕۆشنبیری و هونەری هەولێر، دەربارەی کەمپەینی هونەرمەندانی شاری هەولێر بۆ هاوکاری ڕۆژئاوای کوردستان گوتی: دوای ئەو پڕۆژەیە کە پارێزگای هەولێر، بەهاوبەشی لەگەڵ دەزگای خێرخوازی بارزانی، هەڵسان بە ڕاگەیاندنی کەمپەینی کۆکردنەوەی هاوکاری بۆ خوشک و برایانمان بۆ ڕۆژئاوا، ئێمەش بانگەوازێکمان ڕاگەیاند وەکو بەڕێوەبەرایەتی گشتی ڕۆشنبیری و هونەری هەولێر، بە هاوبەشی لەگەڵ سەندیکای هونەرمەندانی هەولێر لقی هەولێر، بۆ ئەوەی هونەرمەند و ڕۆشنبیرانی شاری هەولێر بتوانن کۆمەکەکانیان کۆبکەنەوە و لە کەمپەینێکی چەند ڕۆژیدا هاوکارییەکانیان بگەیەنن، ئەو کەمپەینەش تەنیا سەنتەری شاری هەولێر نییە، بەڵکو لە شەقڵاوە و کۆیە، بەهەمان شێوە هونەرمەندان و ڕۆشنبیران کەمپینەکەیان درووست کردووە و کۆمەکەکان کۆدەکەنەوە.

سیروان عوسمان ئاماژەی بەوەدا: ئێمە لە هەولێر لەگەڵ سەندیکای هونەرمەندانی کوردستان لقی هەولێر، بە هاوبەشی ڕۆشنبیران و هونەرمەندانی شاری هەولێر، ئەو کۆمەکانەی کە کۆکرابوونەوە لەو کاتەی بانگەوازمان بۆ کردووە کە لەچەند ڕۆژی پێشوودا ڕامانگەیاندبوو، کۆمەکەکانمان گەیاندە کەمپینی کۆکردنەوەی هاوکارییەکانی پارێزگاری هەولێر و بەهاوبەشی لەگەڵ دەزگای خێرخوازی بارزانی، کە هەمیشە دەزگای خێرخوازی بارزانی پێشەنگ بووە لە هەموو بوارەکاندا بەبێ جیاوازی خزمەتی کردووە.