مەسرور بارزانی لە رێوڕەسمی "ئی پسوولە" لێخۆشبوونێکی لە نرخی کارەبادا راگەیاند

ئەمڕۆ سێشەممە، 10ـی شوباتی 2026، بە ئامادەبوونی مەسرور بارزانی، سەرۆکی حکوومەتی هەرێمی کوردستان و عەلی عەللاق، پارێزگاری بانکی ناوەندیی عێراق و ژمارەیەکی زۆر لە وەبەرهێنەران و خاوەنکارانی کوردستان و عێراق؛  پرۆژەی ئی پسوولە (E-Psule) راگەیەنرا. 

لە چوارچێوەی رێوڕەسمەکە، پانێلێک لەگەڵ سەرۆکوەزیران مەسرور بارزانی بە ناونیشانی  "گەشتی دیجیتاڵی، لە دیدگاوە بۆ جێبەجێکردن" بەڕێوەچوو.

_______________________________

بەشێکی قسەکانی سەرۆکوەزیران مەسرور بارزانی:

- پرۆژەی "ئی پسوولە" دەستکەوتێکی گەورەی نیشتمانییە و هەموو عێراق دەتوانێت سوودی لێ وەربگرێت. 

- هەموو خەڵکی عێراق دەتوانێت سوود لە پرۆژەی "ئی پسوولە" وەربگرێت. 

- ئامانجی هەموو پرۆژەکانمان خزمەتکردنی هاووڵاتییانە، هاوکات ئاسانکردنی راییکردنی مامەڵەکانیانە. 

- ئابووریی وڵاتانی جیهان بە پشتبەستن بە پارەدانی کاش زۆر بەرەوپێش ناچێت، بۆیە پێویستە کار لەسەر پەرەپێدانی سیستەمی دیجیتاڵی بکەین. 

- خزمەتگوزارییەکانمان بۆ هەموو هاووڵاتییانن بەبێ جیاوازیی جیۆگرافی. 

- هەوڵ دەدەین پەیوەندییەکی باشتر لە نێوان هاووڵاتییان و بازرگاناندا دروست بکەین. 

- هیچ هاووڵاتی و شارێک لە خزمەتگوزارییەکانمان بێبەش نابن. 

- خزمەتگوزارییە دیجیتاڵییەکان (ئی پسوولە، رووناکی، هەژماری من.. هتد) تەواوکەری یەکترن.

- ئەگەر چەند کەسێکی وەکوو بەڕێز (عەلی عەلاق)ـمان هەبووایە، لەوانەیە ئێستا قەیرانی دارایی لە عێراق نەمابا. 

- چاکسازی لە کەرتی بانکی زۆر گرنگە، چونکە بانکەکان دەتوانن رۆڵێکی گەورەیان هەبێت لە پێشخستنی ئابووریی وڵات. 

- نەوەی نوێ  و گەنجانی ئێستا زۆر شارەزای بەکارهێنانی تەکنەلۆژیان، بەڵام نەوەی پێشوو پێویستی بە رێنوینی هەیە لە چۆنییەتی بەکارهێنانی خزمەتگوزارییە دیجیتاڵییەکان. 

- ئێستا نزیکەی 80%ـی خەڵکی هەرێمی کوردستان کارەبای 24 کاتژمێرییان هەیە. ئەوەی بیستوومە لە تیمەکەم، تا وەرزی هاوین کارەبای هەموو کوردستان دەبێتە 24 کاتژمێری. 

- لە پرۆژەی رووناکیدا، هاووڵاتی خۆی بەرپرسە لە شێوازی بەکارهێنانی کارەبا؛ کێ زیاتر کارەبا بەکاربهێنێت، پارەی زیاتر دەدات، ئەوەی کەمتریش بەکاربهێنێت، پارەی کەمتر دەدات. 

- حکوومەت هیچ کاتێک ناتوانێت دەستکاری لە نرخی کارەبادا بکات، تەنیا هاووڵاتییان بەرپرسن لە چۆنییەتی بەکارهێنانی کارەباکە. 

- لە ئەمڕۆوە تا 30 رۆژی دیکە، هەر هاووڵاتییەک لە رێگەی پرۆژەی "ئی پسوولە"ـەوە پارەی کارەبا بداتەوە، 20% داشکانی بۆ دەکرێت، ئەمەش بە رەچاوکردنی دۆخی دارایی هاووڵاتییان. 

- لە چوارچێوەی پرۆژەی "رووناکی" زیاتر لە چوار هەزار مۆلیدەی ئەهلی کوژێنراونەتەوە، کە بوونەتە هۆی پیسبوونی ئاو و هەوا. 

- بەهۆی پرۆژەی "رووناکی" ئاو و هەوای کوردستان پاک بووەتەوە. 

- سوپاسی خوای گەورە دەکەم کە توانیومانە ئەو بەڵێنانە جێبەجێ بکەین کە پێشتر بە هاووڵاتییانمان دابوون. ئەمەش وایکردووە، متمانەی بە ئێمە هەبێت و پەیوەندیی نێوان حکوومەت و هاووڵاتی باشتر بێت. 

- خەڵکی کوردستان بەرهەمی کارەکانمان دەبینێت. 

- کار لەسەر پەرەپێدانی هەموو کەرتەکان دەکەین و هێشتا لە سەرەتاین. کارێکی زۆرماوە، ئێمە و هاووڵاتییان پێکەوە بۆ وڵاتەکەمان بیکەین. پلانی زۆر باشمان بۆ داهاتووی کوردستان هەیە. پێویستیم بە یارمەتی، پشوودرێژی و متمانەی خەڵک هەیە. 

- دەمانەوێت ساڵ بە ساڵ کوردستان زیاتر پێشبخەین، هاوکات دەتوانین سوود لە ئەزموونی سەرکەوتووی وڵاتانی جیهان وەربگرین. دووپاتی دەکەمەوە، پێشکەوتن هیچ ئاسۆیەکی نییە.  

هەواڵەکە نوێ دەکرێتەوە..