قۆناخی یەکەمی پڕۆژەی "پشتێنەی سەوزایی" بەرەو کۆتایی دەچێت

ئەمڕۆ شەممە، 25ـی نیسانی 2026، لە لێدوانێکی تایبەتدا بۆ ماڵپەڕی کوردستان24، ئومێد خۆشناو، پارێزگاری هەولێر رایگەیاند؛ پایتەختی هەرێمی کوردستان بەرەو داهاتوویەکی سەوزتر و هەناسەیەکی پاکتر هەنگاو دەنێت، ئەمەش بەهۆی نزیکبوونەوە لە کۆتاییهاتنی قۆناخی یەکەمی پڕۆژەی ستراتیجیی "پشتێنەی سەوزایی هەولێر".

پارێزگاری هەولێر ئاماژەی بەوە دا، ئەم پڕۆژە مەزنە بە یەکێک لە گرنگترین و کاریگەرترین هەنگاوەکانی حکوومەتی هەرێمی کوردستان دادەنرێت بە مەبەستی رووبەڕووبوونەوەی گۆڕانکارییەکانی کەشوهەوا و پاراستنی ژینگەی ناوچەکە.

پارێزگار راشیگەیاند پڕۆژەکە بە ژمارە؛

78 کیلۆمەتر: درێژیی ئەو پشتێنە سەوزاییەیە کە بە دەوری شاری هەولێردا دروست دەکرێت بۆ رێگریکردن لە تۆز و خۆڵ و پاککردنەوەی هەوا.

7 ملیۆن دار: بڕیارە لە چوارچێوەی ئەم پڕۆژەیەدا بچێندرێن، کە درەختی بەرهەمدار و جوانی وەک (زەیتوون، فستەق و پرتەقاڵ) لەخۆدەگرێت، بەمەش جوانیی سروشتی و سوودی ئابووری پێکەوە کۆدەکرێنەوە.

قۆناخی یەکەم: لەم قۆناخەدا کە کارەکانی بەرەو کۆتایی دەچن، رووبەری 4,200 دۆنم زەوی بە 700 هەزار نەمام داچێندراوە.

کاریگەریی ژینگەیی: ئەم پڕۆژە ستراتیجییە ساڵانە دەبێتە هۆی کەمکردنەوەی تا 210 هەزار تۆن گازی زیانبەخش، ئەمەش کاریگەرییەکی گەورەی لەسەر دابینکردنی هەوایەکی تەندروست بۆ دانیشتووانی پایتەخت دەبێت.
ئەم پڕۆژەیە لە چوارچێوەی پلانە درێژخایەنەکانی حکوومەتی هەرێمی کوردستاندایە بۆ زیادکردنی رێژەی سەوزایی و رەخساندنی ژینگەیەکی لەبار و تەندروست بۆ هاووڵاتیان.