بەرەکەی ناتانیاهۆ لە هەڵبژاردنی پەرلەمانی ئیسرائیلدا لە پێشەوەیە
ئەمڕۆ ئەنجامە بەراییەکانی هەڵبژاردنی پەرلەمانی ئیسرائیل هاوپەیمانێتییەکەی بنیامین ناتانیاهۆ، سەرۆکوەزیرانی ئیسرائیل دەردەخەن، لەکاتێکدا چاوەڕوان دەکرێت ئەنجامە کۆتاییەکان لە داهاتوودا ئاشکرا بکرێن.
کۆمیسیۆنی باڵای هەڵبژاردنەکان ئەمڕۆ چوارشەممە، 28ـی تشرینی یەکەمی 2026، لە نوێترین ئاماردا بڵاویکردەوە، دوای ژماردنی 28%ـی دەنگەکان، هاوپەیمانێتییەکەی ناتانیاهۆ 59 کورسی و بەرەکەی غادی ئایزینکۆت 46 کورسییان بەدەستهێناوە. بۆ پێکهێنانی حکوومەت و مسۆگەرکردنی زۆرینە لە کنێستی 120 کورسی، هەر لایەنێک پێویستی بە 61 کورسی هەیە.
کۆمیسیۆنی هەڵبژاردنەکان روونیکردەوە، رێژەی بەشداری لە هەڵبژاردنەکەدا گەیشتووەتە 77.7%، کە بەرزترین رێژەیە لە زیاتر لە 20 ساڵی رابردوودا و بە نزیکەی حەوت خاڵی سەدی لە هەڵبژاردنی ساڵی 2022 بەرزترە. پێشتر راپرسییەکان ئەوەیان روونکردبووەوە کە هەڵبژاردنەکە ئەنجامێکی یەکلاییکەرەوەی نابێت و ململانێکان لە نێوان بەرەی ئۆپۆزیسیۆن بە سەرۆکایەتیی ئایزینکۆت و بەرەکەی ناتانیاهۆدا توندە.
پێشبینی دەکرێت گفتوگۆکانی پێکهێنانی حکوومەت بەهۆی مامەڵە سیاسییە ئاڵۆزەکانەوە چەند هەفتەیەک بخایەنێت. ئەم دۆخە نادیارە رەنگە رێگە بە ناتانیاهۆ بدات، کە خاوەنی درێژترین ماوەی دەسەڵاتە لە ئیسرائیل، وەک سەرۆکی حکوومەتی کاربەڕێکەر لە پۆستەکەی بەردەوام بێت.
بنیامین ناتانیاهۆ، سەرۆکوەزیرانی ئیسرائیل کاتژمێر 3:00ـی بەرەبەیان لە قودس بە لایەنگرانی پارتی لیکودی گوت: "پێویستە حکوومەتێکی راستڕەوی بەهێز پێکبهێنین". ناتانیاهۆ تیشکی خستە سەر سەرکەوتنە سەربازییەکانی ئیسرائیل و ئەوەی بە فرسەتێکی مێژوویی بۆ لەناوبردنی هەڕەشەی ئێران ناوبرد.
لە بەرامبەردا غادی ئایزینکۆت لە تەلئەڤیڤ بە لایەنگرانی گوت: "دەنگدەرانی ئیسرائیل دژی بەردەوامبوونی ناتانیاهۆ لە سەرۆکوەزیرانی ئیسرائیل دەنگیان داوە". ئایزینکۆت ئەوەشی خستەڕوو، ئەگەر ئەو سەرکردەیەکی بەرپرسیار بوایە، متمانە پێنەکردنی گەلی قبووڵ دەکرد و ئەمڕۆ دەستلەکارکێشانەوەی خۆی لە کاری سیاسی رادەگەیاند.
پێشبینی دەکرێت پارتە ئایینییە راستڕەوە توندڕەوەکان بە سەرۆکایەتیی ئیتمار بن غەفیر و بێزالێل سمۆتریچ بە کۆی گشتی 13 کورسی لە چوارچێوەی بەرەکەی ناتانیاهۆدا بەدەستبهێنن. لەو نێوەندەدا، پارتە عەرەبییەکان رەنگە رۆڵێکی سەرەکی لە دیاریکردنی هاوسەنگیی هێزدا بگێڕن. ئایزینکۆت، سەرۆکی پارتی یشار و سەرۆک ئەرکانی پێشووی سوپا، بە دووری دەزانێت حکوومەت لەگەڵ ئەو پارتانە پێکبهێنێت.
بەهۆی دابەشبوونی سیستەمی سیاسیی ئیسرائیل، ئەگەری هەیە پارتە بچووکەکان لە گفتوگۆکانی هاوپەیمانێتییدا رۆڵی یەکلاکەرەوە بگێڕن، کە رەنگە چەند هەفتە یان چەند مانگێک بخایەنێت. ئەگەر هیچ کام لە بەرەکان نەتوانن حکوومەت پێکبهێنن، ئەگەری هەیە پێویست بە هەڵبژاردنی نوێ بکات.