سبەینێ یەکەم کاروانی حاجیانی سلێمانی بەرەو سعوودیە بەڕێدەکەون
بەڕێوەبەری ئەوقاف و حەج و عومرەی سلێمانی رایگەیاند، سبەینێ دووشەممە، گەشتە ئاسمانییەکانی حاجیانی سنووری پارێزگای سلێمانی بۆ وڵاتی سعوودیە دەستپێدەکات.
مامۆستا عەباس خدر، بەڕێوەبەری ئەوقاف و حەج و عومرەی سلێمانی بە کوردستان24ـی راگەیاند، "سبەینێ دووشەممە، 11ـی ئایاری 2026، کاتژمێر 5ـی ئێوارە، یەکەم گەشتی حاجیانی سلێمانی لە فڕۆکەخانەی نێودەوڵەتی سلێمانییەوە بەرەو وڵاتی سعوودیە بە مەبەستی ئەنجامدانی فەریزەی حەج بەڕێدەکەوێت."
بەڕێوەبەری ئەوقاف ئاماژەی بەوەش کرد، کە سێ گەشتیان بۆ ئەو مەبەستە تەرخان کردووە و هەر گەشتێک 147حاجی لەخۆدەگرێت، هەروەها گوتیشی، "کاتژمێر 11ـی شەوی سبەینێش، گەشتێکی دیکەی حاجیان ئەنجام دەدرێت کە ئەویش بە هەمان شێوە 147 حاجی تێیدا گەشت دەکەن." دەشڵێت، کۆی گشتیی حاجیانی پارێزگای سلێمانی 1262 کەسن.
شەممە 9ـی ئایاری 2026، کاروان ستونی گوتەبێژی حەج و عومرەی هەرێمی کوردستان، رایگەیاند، ژمارەیەک لەو کەسانەی بە مەبەستی ئەنجامدانی فەریزەی حەج بۆ وڵاتی سعوودەیە بەڕێکەوتوون، بە سەلامەتی گەیشتوونەتە ناو خاکی ئەو وڵاتە، ئاماژەی بەوەشکردووە، 880 حاجی ئێستا لە ناو خاکی سعوودیەن و ئەوانی دیکەش بەمنزیکانە دەگەنە مەککە.
کاروان ستونی گوتیشی، مەسرور بارزانی، سەرۆکی حکوومەتی هەرێمی کوردستان، بەردەوام پاڵپشت و هاوکاری پرۆسەی حەج بووە و بۆ ئەمساڵیش بڕی دوو ملیار و 800 ملیۆن دیناری وەک پاڵپشتی بۆ پرۆسەکە تەرخان کردووە، ئەوەش لەپێناو کەمکردنەوەی ئەرکی دارایی سەر شانی حاجیان، گوتیشی، لە ماوەی چوار ساڵی کابینەی نۆیەمدا ئەم پاڵپشتییە هەموو ساڵێک بەردەوام بووە.
پێنجشەممە، 7ـی ئایاری 2026، یەکەم کاروانی حاجیانی هەرێم لە فڕۆکەخانەی نێودەوڵەتیی هەولێرەوە بەرەو سعوودیە بەڕێکەوتن. بڕیارە ئەمساڵ پێنج هەزار و 120کەس لە هەرێمی کوردستانەوە بۆ فەریزەی حەج گەشت بکەن.