کۆبوونەوەی پەرلەمان بۆ دەنگدان بە کابینەی نوێی حکوومەتی عێراق دەستی پێکرد

بە ئامادەبوونی نێچیرڤان بارزانی، سەرۆکی هەرێمی کوردستان و ژمارەیەک لە سەرکردە سیاسییەکانی عێراق، کۆبوونەوەی ئاسایی پەرلەمان بۆ دەنگدان و متمانەدان بە کابینەی نوێی حکوومەتی فیدراڵ دەستی پێکرد.

هەرچەندە بە گوێرەی کارنامەی کۆبوونەوەکە، بڕیاربوو کاتژمێر 4:00ـی ئێوارەی ئەمڕۆ پێنجشەممە 14ـی ئایاری 2026، کۆبوونەوەکە دەست پێبکات، بەڵام بەهۆی دواکەوتنی بەشێک لە پەرلەمانتارانی فراکسیۆنە جیاوازەکان، کۆبوونەوەکە کاتژمێرێک و 45 خولەک دواخرا.

لە میانی کۆبوونەوەکەدا، سەرۆکی پەرلەمان داوای لە عەلی فالح زەیدی، سەرۆکوەزیرانی راسپێردراو کرد کە کارنامەی وەزارییەکەی بخوێنێتەوە بە مەبەستی خستنە دەنگدانییەوە. دوای ئەوەی سەرۆکوەزیرانی راسپێردراو خوێندنەوەی بۆ کارنامەکەی کرد، پەرلەمانی عێراق بە زۆرینەی دەنگ کارنامە وەزارییەکەی پەسەند کرد.