مەسرور بارزانی لە بەغدا: داکۆکیمان لەسەر هەموو مافەکانی خەڵکی کوردستان کردووە

یەکشەممە، 24ـی ئایاری 2026، مەسرور بارزانی، سەرۆکی حکوومەتی هەرێمی کوردستان, لە چوارچێوەی زنجیرە کۆبوونەوە و دیدارە دیپلۆماسییەکانیدا لە پایتەختی فیدراڵی، لەگەڵ عەممار حەکیم، سەرۆکی رەوتی حیکمەی نیشتمانی کۆبووەوە.

کۆبوونەوەکە کە بە ئامادەبوونی فالح ساری، وەزیری دارایی عێراق بەڕێوە چوو، تەرخان کرابوو بۆ هەڵسەنگاندنێکی هەمەلایەنەی بارودۆخی گشتیی عێراق و ئاڵنگارییە سیاسی و ئابوورییەکانی قۆناغی هەنووکەیی.

تەوەری سەرەکیی کۆبوونەوەکە، جەختکردنەوە بوو لە پێویستیی پشتیوانیکردنی کابینەی نوێی حکوومەتی فیدراڵ بۆ رووبەڕووبوونەوەی ئاڵنگاری و ئاستەنگە جۆراوجۆرەکان و چارەکردنی کێشەکان لەگەڵ هەرێمی کوردستان لە چوارچێوەی دەستوور و رێزگرتن لە مافەکانی گەلی کوردستان و گشت پێکهاتەکان.

مەسرور بارزانی، دوای کۆتاییهاتنی کۆبوونەوەکە و گفتوگۆکردن لەسەر پرسە چارەنووسسازەکان، لە کۆنفرانسێکی رۆژنامەوانییدا ناوەڕۆکی کۆبوونەوەکەی بۆ رای گشتی خستە روو.

سەرۆکی حکوومەتی هەرێمی کوردستان گوتی: کۆتاییمان بە سەردانەکە هێنا شوکر بۆ خوا دیدار و کۆبوونەوەی زۆر باشمان هەبوو لەگەڵ زۆرینەی بەرپرسان، لەسەر کۆی پرسە گرنگەکان قسەی پێویستیمان کردووە، داکۆکیمان لەسەر هەموو مافەکانی خەڵکی کوردستان کردووە.

باسی لەوەش کرد، داوامان کرد مووچەی خەڵکی هەرێمی کوردستان وەک هەموو هاووڵاتییانی دیکەی عێراق تێکەڵ بە هیچ بابەتێکی سیاسیی نەکرێت، ئێمەش وەڵامی ئەرێنیمان لە بەرپرسان بیستووە کە بەو شێوەیە مامەڵە لەگەڵ مووچەی مووچەخۆرانی هەرێمی کوردستان دەکەن.

مەسرور بارزانی رایگەیاند: لە چوارچێوەی کۆبوونەوەمان لەگەڵ عەممار حەکیم، کە وەزیری دارایی عێراق تێیدا بەشدار بوو، لەسەر ئەوە قسەمان کردووە مووچەی مووچەخۆرانی هەرێم بنێردرێت و هیوادارین بەردەوام بن لە ناردنی مووچە.

لە درێژەی قسەکانیدا ئاماژەی بەوە کرد، هیوادارین لە دوای جەژن کابینەی وەزاری حکوومەتی عێراق تەواو بکرێ، هەروەها بڕیارە دوای جەژن جارێکی دیکە کۆبوونەوە بکرێت بۆ راستکردنەوەی ئەو هەڵانەی کە پێشتریش هەبوون بۆ دەستنیشانکردنی ئەندامەکان بۆ تەواوکردنی پێکهاتەی کابینەی وەزاریی عەلی زەیدی.

لەبارەی داهاتی ناوخۆی هەرێمی کوردستانەوە، مەسرور بارزانی، ئاشکرای کرد، لەگەڵ بەرپرسانی باڵای عێراق لەسەر بابەتە ستراتیژییەکان قسەمان کردووە، لەسەر ئەوەی کە پێویستە هەرێمی کوردستان هەموو پارێزگاکان ئەو بوارەیان پێ بدرێت بتوانن داهاتی نەوتی و نانەوتی، لەسەر ئاستی پارێزگاکانی خۆیان زیاد بکەن، بۆ ئەوەی بتوانن زیاتر رۆڵ ببینن لە دابینردکنی بەشی خۆیان بۆ حکوومەتی فیدراڵی، لەسەر ئەوە قسەی پێویستمان کردووە.

جەختی لەوەش کردەوە، ئێستا ئەوەی ئێمە پێمان گوتوون نیوەی ئەو داهاتەی کە ئێستا لە هەرێم هەیە ئێمە ئامادەین وەک مانگەکانی پێشتوور لە بەشی حکوومەتی هەرێمی کوردستان بنێرێن بۆ حکوومەتی فیدراڵی، بۆ ئەوەی ئەوانیش بەردەوام بن لە ناردنی مووچە.

سەرۆکی حکوومەتی هەرێمی کوردستان ئەوەشی خستە روو، ئێمە وەیستوومانە سوود لە هەڵەکانی رابردوو وەربگیرێت، هەموو لایەک پێداچوونەوە بە کێشەکان و هۆکارەکانی بکەن، بەڵام ئێمە ئێستا سەرنجمان لەسەر دەستنیشانکردنی شێوازی پەیوەندیی حکوومەتی هەرێمە لەگەڵ حکوومەتی فیدراڵی، سەرنجمان لەسەر پەیوەندییەکانی داهاتووە نەک رابردوو.