پشتیوان سادق: دوای جەژن هەنگاوی کردەیی بۆ کۆبوونەوەی لایەنەکان دەنرێت

ئەمڕۆ چوارشەممە، 27ـی ئایاری 2026، پشتیوان سادق، وەزیری ئەوقاف و کاروباری ئاینیی لە حکوومەتی هەرێمی کوردستان، لە کۆنگرەیەکی رۆژنامەوانیدا چەند پرسێکی گرنگی سیاسی و کارگێڕی خستەڕوو، ئاماژەی بەوە کرد، پارتی دیموکراتی کوردستان ئامادەکاری دەکات بۆ قۆناخێکی نوێی گفتوگۆکان.

پشتیوان سادق رایگەیاند: "پەیامەکەی سەرۆک بارزانی پێویستی بە کردار هەیە. ئێمە وەک پارتی دیموکراتی کوردستان هەموو ئامادەکارییەکمان کردووە بۆ ئەوەی ئەو پەیامە هەنگاوی کردەیی بۆ بنێین و جێبەجێی بکەین." ئاشکراشی کرد، بڕیارە دوای جەژنی قوربان، هەنگاوی جددی بنرێت بۆ کۆبوونەوەی لایەنە سیاسییەکان، بەتایبەت لە نێوان پارتی دیموکراتی کوردستان و یەکێتیی نیشتمانیی کوردستان.

وەزیری ئەوقاف جەختی کردەوە، پەیوەندییەکانیان لەگەڵ یەکێتی و لایەنەکانی دیکە بەردەوامە و گوتی: "هەندێک گرفتی بچووک هەن، بەڵام هەوڵی چارەسەرکردنیان دەدەین لە پێناو بەرژەوەندی گشتی."

لە بەشێکی دیکەی قسەکانیدا، پشتیوان سادق ئاماژەی بە ئەنجامی سەردانەکەی مەسرور بارزانی، سەرۆکوەزیرانی هەرێمی کوردستان بۆ بەغدا کرد و رایگەیاند: "بەگوێرەی هەڵسەنگاندنی ناوەندە عەرەبی و عێراقییەکان، سەردانەکە زۆر سەرکەوتوو بووە."

باسی لەوەش کرد، لەو سەردانەدا گفتوگۆی باش لەسەر پرسە دەستوورییەکان و ئەو ماددانەی پەیوەندییان بە هەرێمی کوردستانەوە هەیە کراوە، لەوانە: (پرسی هاوبەشی، سازان، هاوسەنگی، بودجەی هەرێم، ماددەی 140 و پرسی پێشمەرگە). هیوایشی خواست حکوومەتی نوێی عێراق پابەندی ئەو رێککەوتنانە بێت کە لەسەری پێکهێنراوە.

لەلایەکی دیکەوە، ئومێد خۆشناو، پارێزگاری هەولێر پیرۆزبایی جەژنی قوربانی لە هاووڵاتیان کرد و داوای لێکردن لە کاتی ئەنجامدانی قوربانیدا، رێنماییە تەندروستییەکان و پاراستنی ژینگەی شارەکە رەچاو بکەن. خۆشناو هیوای خواست ئەم جەژنە ببێتە مایەی ئاشتەوایی و تەبایی نێوان هەموو لایەنەکان.