هەولێر و بەغدا رێککەوتنی سیستەمی ئەسیکۆدایان واژۆ کرد
هەردوو حکوومەتی کوردستان و عێراق، لەسەر تەواوی وردەکارییە هونەرییەکانی سیستمی ئەسیکۆدا بۆ رێکخستنی کاروباری دەروازە سنوورییەکان رێککەوتن.
سەرچاوەیەکی ئاگادار لە نێو کۆبوونەوەکان بە کوردستان24ـی رایگەیاند، ئەمڕۆ پێنجشەممە، 18ـی حوزەیرانی 2026، شاندی هەرێمی کوردستان و حکوومەتی عێراق لە بەغدا لەبارەی تەواوی وردەکارییە هونەرییەکانی سیستمی ئەسیکۆدا رێککەوتن.
ئێوارەی دوێنێ چوارشەممە، 17ـی حوزەیران، شاندێکی هونەریی حکوومەتی هەرێمی کوردستان بۆ تاوتوێکردنی جێبەجێکردنی سیستمی ئەسیکۆدا سەردانی بەغدای کرد و ئەمڕۆ کۆبوونەوەکانیان کرد.
پێشتریش سامر قاسم، بەڕێوەبەری دەستەی گشتیی گومرگی عێراق بۆ كوردستان24ـی رایگەیاندبوو، هەماهەنگیی تەواو و لێكتێگەیشتنی باشیان لەگەڵ هەرێمی كوردستان بۆ جێبەجێكردنی سیستمی ئەسیكۆدا لە دەروازە سنوورییەكانی هەرێمی كوردستان هەیە.
سیستمی ئەسیکۆدا (ASYCUDA) سیستمێکی ئەلیکترۆنیی جیهانییە بۆ بەڕێوەبردنی داتاکانی گومرگ و لەلایەن کۆنفرانسی نەتەوە یەکگرتووەکان بۆ بازرگانی و گەشەپێدان (UNCTAD) پەرەی پێ دراوە.
ئامانج لە جێبەجێکردنی ئەم سیستمە لە عێراق و هەرێمی کوردستان، یەکخستنی رێکارە گومرگییەکان، نەهێشتنی گەندەڵی، ئاسانکاریکردن بۆ جووڵەی بازرگانی و زیادکردنی داهاتە نانەوتییەکانە.
لە ماوەی رابردوودا حکوومەتی فیدراڵیی عێراق هەوڵی داوە سەرجەم دەروازە سنوورییەکان بەم سیستمە ببەستێتەوە، ئەمەش پێویستی بە هەماهەنگییەکی وردی هونەری هەبوو لە نێوان دامەزراوەکانی هەولێر و بەغدا.