پێشەوا هەورامانی: کابینەی نۆیەم بە پڕۆژەی ستراتیژی وەڵامی ئاستەنگەکانی دایەوە
پێشەوا هەورامانی رایگەیاند: کابینەی نۆیەم بە سەرۆکایەتیی مەسرور بارزانی، مۆدێلێکی نوێی کارکردنی پێشکەش کرد کە تێیدا لە جیاتی پشتبەستن بە دروشم، بە پڕۆژەی ستراتیژی و درێژخایەن وەڵامی ئاستەنگەکانی دایەوە و توانی بنەمایەکی بەهێز بۆ ئاییندەی ئابووری و کارگێڕیی هەرێمی کوردستان دابڕێژێت.
هەینی، 10ـی تەممووزی 2026، پێشەوا هەورامانی، لە راگەیەنراوێکدا ئاماژەی بەوە کرد، کابینەی نۆیەمی حکوومەت بە سەرۆکایەتیی سەرۆکوەزیران مەسرور بارزانی، بە کردەوە نیشانیدا کە ئیرادەی بونیاتنان و چاکسازی لەسەرووی هەموو بەربەستەکانەوەیە.
ئاماژەی بەوەش کرد، کە حکوومەت لە جیاتی پشتبەستن بە دروشم، بە پڕۆژەی ستراتیژی و درێژخایەن وەڵامی ئاستەنگەکانی دایەوە و توانی بنەمایەکی بەهێز بۆ ئاییندەی ئابووری و کارگێڕیی هەرێمی کوردستان دابڕێژێت.
هەورامانی روونی کردەوە، لە سایەی دونیابینیی سەرۆکوەزیران مەسرور بارزانی، ئێستا هەرێمی کوردستان هەنگاوی زۆر گەورەی ناوە لە بواری زامنکردنی ئاسایشی خۆراک و داڕشتنی سیاسەتێکی ورد و گونجاو بۆ ئیدارەدانی سەرچاوەکانی ئاو.
هەروەها گوتیشی: "کەرتی کشتوکاڵ و گەشتیاری لە قۆناغێکی جیاواز و پێشکەوتوودان و، تۆڕی ڕێگەوبان و شەقامە نوێیەکانیش بە جۆرێک گۆڕانکاریی ریشەیییان بەسەردا هاتووە کە پێشتر وێنەی نەبووە."
هەورامانی تیشکی خستە سەر ئەو ئاستەنگ و ڕێگرییە دارایی و دەرەکییانەی کە لە ماوەی رابردوودا هاتنە پێشەوە و رایگەیاند: "ئەگەر دژایەتی، رێگری، بڕینی بودجە و ئەو قەیرانە دروستکراوانەی لەبەردەم کارەکانی کابینەی نۆیەمدا هەبوون نەبووانایە، ئێستا ئاستی گەشەسەندن و پێشکەشکردنی خزمەتگوزارییەکان بە هاووڵاتییان لە هەرێمی کوردستاندا لە قۆناخێکی زۆر باڵاتر و پێشکەوتووتردا دەبوو."