عێراق و سووریا لەسەر نۆژەنکردنەوەی بۆریی نەوتی کەرکووک – بانیاس رێککەوتن
رۆژی هەینی لە واشنتن هەردوو وڵاتی عێراق و سووریا یاداشتێکی لێکتێگەیشتنیان بۆ دووبارە نۆژەنکردنەوەی هێڵی بۆریی نەوتی نێوان کەرکووک و بانیاس واژۆ کردووە، هاوکات بڕیارە کۆمپانیای "شیڤرۆن"ی ئەمریکی ئەرکی جێبەجێکردنی پڕۆژەکە بگرێتە ئەستۆ.
هەینی 17ـی تەممووزی 2026، هەردوو وڵاتی عێراق و سووریا یاداشتێکی لێکتێگەیشتنیان بۆ دووبارە نۆژەنکردنەوەی هێڵی بۆریی نەوتی نێوان کەرکووک و بانیاس واژۆکرد، ئەم هەنگاوە لە چوارچێوەی واژۆکردنی 50 رێککەوتنامە و یاداشتنامەی لێکتێگەیشتندایە لە نێوان عێراق و ویلایەتە یەکگرتووەکانی ئەمریکا، کە کۆی گشتیی بەهای ئەو رێککەوتنانە دەگاتە 60 ملیار دۆلار.
لای خۆیەوە ئەمریکا پێشوازیی لەو هەنگاوە کرد و باڵیۆزخانەی ئەمریکا لە بەغدا لە راگەیەندراوێکدا رایگەیاند: " ئەمریکا پێشوازی لە واژۆکردنی یاداشتێکی لێکتێگەیشتنی مێژوویی لە نێوان حکوومەتەکانی عێراق و سووریا دەکات سەبارەت بە نۆژەنکردنەوەی هێڵی بۆریی نەوتی خاوی نێوان هەردوو وڵات."
لە راگەیەندراوەکەدا ئاماژە بەوەش کراوە، ئەم پڕۆژە ستراتیژییەی ژێرخان دەبێتە هۆی بەهێزکردنی ئاسایش و سەقامگیری لە رێگەی پەرەپێدانی پەیوەندییە ناوچەییەکان و بووژانەوەی ئابووری، هەروەها جەخت کراوەتەوە، کۆمپانیا ئەمریکییەکان رۆڵێکی سەرەکی لە ئەنجامدانی کارەکاندا دەگێڕن.