زەیدی جەخت لە گرنگیی دروستکردنی هاوبەشیی ئابووری لەگەڵ لوبنان دەکاتەوە
عێراق و لوبنان هەماهەنگییەکانیان بۆ کەمکردنەوەی گرژییەکانی ناوچەکە چڕ دەکەنەوە
حکوومەتی عێراق و لوبنان لە بەغدا کۆبوونەوەیەکی فەرمیی هاوبەشیان لەسەر پەرەپێدانی کەرتی نەوت و گەیاندن بەڕێوەبرد، بە ئامانجی قووڵکردنەوەی هاوبەشیی ئابووری و بەدیهێنانی گەشەپێدانی بەردەوام بۆ هەردوولا.
یەکشەممە، 26ـی تەممووزی 2026، نووسینگەی راگەیاندنی سەرۆکوەزیرانی عێراق بڵاوی کردەوە، حکوومەتی وڵاتەکە و شاندێکی فەرمیی لوبنان، لە بەغدا دانوستانێکی هاوبەشیان لەسەر پەرەپێدانی کەرتی نەوت و گەیاندن ئەنجامداوە.
دانوستانەکان بە سەرپەرشتی و ئامادەبوونی عەلی فالح زەیدی، سەرۆکوەزیرانی عێراق و نەواف سەلام، سەرۆکوەزیرانی لوبنان بەڕێوەچوو.
بە پێی راگەیەنراوی نووسینگەی زەیدی، لەم دانوستانانەدا باس لە رێگەکانی پتەوکردنی پەیوەندییە دووقۆڵییەکان لە بوارە جیاوازەکانی ئابووری، سیاسی و ئەمنیدا کرا.
هەروەها پەرەپێدانی هاوبەشیی نێوان هەردوو وڵات بە شێوازێک کە خزمەت بە گەشەپێدانی گشتگیر و بەردەوام بکات، خرایە بەرباس.
سەرۆکوەزیرانی عێراق، لە کۆبوونەوەکەدا جەختی لە قووڵیی پەیوەندییەکانی نێوان بەغدا و بەیرووت کردەوە و هیوای خواست ئەم دانوستانانە ببنە مایەی دروستبوونی هاوبەشیی ئابووریی بەرهەمدار لە کەرتی جیاوازدا.
هەروەها ئاماژەی بە گرنگیی هەماهەنگیی هاوبەش کرد بۆ رووبەڕووبوونەوەی ئاڵنگارییەکانی ناوچەکە و کەمکردنەوەی گرژییەکان بە مەبەستی چەسپاندنی سەقامگیریی ناوچەیی.
ئەمڕۆ نەواف سەلام، سەرۆکوەزیرانی لوبنان، بە سەردانێکی فەرمی گەیشتە بەغدای پایتەختی عێراق.