چەند پەیامێک لە سەرۆکوەزیران مەسرور بارزانییەوە
ئەمڕۆ دووشەممە، 27ـی تەممووزی 2026، مەسرور بارزانی، سەرۆکی حکوومەتی هەرێمی کوردستان، لە کۆنفرانسێکی رۆژنامەوانیدا بەوردی تیشکی خستە سەر دۆخی سیاسی و ئابووریی ناوچەکە، هاوکات باسی لە کێشەکانی مووچە، پێکهێنانی کابینەی نوێ، سیستمی باج، کەمبوونەوەی کارەبا و هۆکارەکانی گرانبوونی نرخی بەنزین کرد و پەیامی ئاراستەی لایەنە ناوخۆییەکان و بەغداش کرد.
سەرۆکوەزیران مەسرور بارزانی رایگەیاند، هەرێمی کوردستان بەشێک نییە لەو گرژی و ململانێیانەی لە ناوچەکەدا هەن، بەڵکوو بەردەوام لەگەڵ چارەسەری ئاشتییانەی هەموو کێشەکاندایە. گوتیشی، "سەرەڕای ئەوەی بەشێک نین لە گرژی و ئاڵۆزییەکان، رۆژانە هێرشمان دەکرێتە سەر".
سەرۆکی حکوومەت سوپاسی خۆڕاگریی هاووڵاتییانی کرد بەرانبەر ئەو دۆخە سەختەی دروست بووە و دڵنیایی دا رۆژانی رووناکتر و باشتر لە پێشە.
سەبارەت بە پەیوەندییەکانی هەولێر و بەغدا، مەسرور بارزانی پشتیوانیی تەواوی بۆ عەلی فالح زەیدی، سەرۆکوەزیرانی عێراق دەربڕی لە هەنگاوەکانی بەرەنگاربوونەوەی گەندەڵی و چاکسازیی ئابووریدا. روونیشی کردەوە راگرتنی هەناردەی نەوت زیانی زۆر گەورەی بە ئابووریی هەموو عێراق گەیاندووە.
لەبارەی پرسی مووچە و داهاتی ناوخۆ، مەسرور بارزانی رایگەیاند، پێشتر بڕیاری پێدانی 120 ملیار دینار لەسەر هەرێمی کوردستان سەپێنراوە و ئەمەش کاریگەریی قورسی لەسەر داهاتی ناوخۆ دروست کردووە. داوای لە بەغدا کرد پێداچوونەوە بەو بڕیارەدا بکات بۆ ئەوەی هەرێمی کوردستان بتوانێت ئەرکەکانی خۆی بە باشی جێبەجێ بکات.
لەبارەی کاراکردنەوەی پەرلەمان و پێکهێنانی حکوومەتیش، مەسرور بارزانی ئاماژەی بەوە کرد، نزیکەی 20 مانگ بەسەر هەڵبژاردندا تێپەڕیوە، بەڵام تاوەکوو ئێستا حکوومەت پێکنەهاتووە، ئەمەش بارگرانییەکی زۆری خستووەتە سەر هاووڵاتییان، بۆیە داوای لە پارتە سیاسییەکان کرد رێز لە دەنگی خەڵک بگرن، پەرلەمان کارا بکەنەوە و بە خێرایی کابینەی نوێ پێکبهێنن.
لەسەر پرسی کەمبوونەوەی کاتژمێرەکانی پێدانی کارەبا، سەرۆکی حکوومەت باسی لە پرۆژەی کارەبای 24 کاتژمێری کرد و ئاشکرای کرد بەهۆی چەند مەترسییەکی ئەمنییەوە کۆمپانیای بەرهەمهێنەر لە کێڵگەی کۆرمۆر ناچار بووە ئاستی بەرهەمهێنانی گاز کەم بکاتەوە، ئەمەش راستەوخۆ کاریگەریی لەسەر وێستگەکانی کارەبا داناوە.
سەرۆکی حکوومەت هیوای خواست ئەم کێشەیە بەمزووانە چارەسەر ببێت بۆ ئەوەی بەرهەمهێنانی گاز و بەنزین و کارەبا بگەڕێتەوە ئاستی جاران.
سەرۆکی حکوومەت لە بەشێکی دیکەی قسەکانیدا تیشکی خستە سەر پرسی سووتەمەنی و گرانبوونی نرخی بەنزین و رەخنەی لە بەغدا گرت بەوەی بە ملیۆنان دۆلار بۆ پاڵپشتیی سووتەمەنی لە ناوچەکانی دیکەی عێراق خەرج دەکات، بەڵام هیچ بڕە پارەیەک بۆ هەرێمی کوردستان تەرخان ناکات.
باسی لەوەش کرد، عێراق رۆژانە یەک ملیۆن بەرمیل نەوت بۆ پێداویستیی ناوخۆ بەکاردەهێنێت، ئەگەر بەپێی رێژەی 12.6% هەژمار بکرێت دەبێت پشکی هەرێمی کوردستان 126 هەزار و 800 بەرمیل نەوت بێت، بەڵام بەغدا تەنیا ئامادەیە 50 هەزار بەرمیل بدات.
مەسرور بارزانی دووپاتی کردەوە، ئەمە ستەمێکی گەورەیە و قبووڵی ناکەن، هاوکات وەزارەتی سامانە سروشتییەکانی راسپاردووە لێکۆڵینەوە لە تێچووی هاوردەکردن و فرۆشتنی بەنزین بکەن، رێگە بە هیچ جۆرە قۆرخکارییەکیش نادەن و نرخی بەنزینی نۆرماڵی حکوومی و بازرگانی لەنێوان 750 بۆ 850 دیناردا جێگیر دەکەن لەپێناو پاراستنی بەرژەوەندیی خەڵکدا.
نوێ دەکرێتەوە..