ئالان حەمە سەعید پێشوازی لە وەزیری پەروەردەی سووریا کرد
بەمەبەستی بەشداریکردن لە چوارەمین کۆڕبەندی پەروەردەیی کوردستان، محەمەد ترکۆ وەزیری پەروەردەی سووریا گەیشتە هەولێری پایتەخت و لەلایەن وەزیری پەروەردەی هەرێمی کوردستانەوە پێشوازی لێکرا.
وەزارەتی پەروەردەی هەرێمی کوردستان رایگەیاند، ئالان حەمەسەعید وەزیری پەروەردە، لە فرۆکەخانەی نێودەوڵەتیی هەولێر پێشوازیی لە د. محەمەد عەبدولرەحمان ترکۆ، وەزیری پەروەردەی سووریا و شاندێکی یاوەری کردووە.
بەگوێرەی راگەیەندراوێکی وەزارەتی پەروەردەی سووریا، ئەم سەردانە فەرمییەی ترکۆ بە مەبەستی بەشداریکردنە لە کار و چالاکییەکانی "چوارەمین کۆڕبەندی پەروەردەیی کوردستان".
هەر لە راگەیەندراوەکەدا هاتووە، بەشداریکردن لەم کۆڕبەندە لە چوارچێوەی بەهێزکردنی هەماهەنگییە پەروەردەییەکان، ئاڵوگۆڕکردنی ئەزموونەکان و تاوتوێکردنی ئاسۆکانی هاوکاریی هاوبەشە، کە خزمەت بە بەرەوپێشبردنی پرۆسەی پەروەردە و فێرکردن دەکات.
کۆڕبەندی پەروەردەیی کوردستان کە بڕیارە سبەی 30ی تەممووز چوارەمین خولی خۆی دەستپێبکات، پلاتفۆرمێکی گەورەیە بۆ ئاڵوگۆڕی بیروڕا و پاراوەکردنی ئەزموونەکان لە بواری پەروەردەدا، هەروەها دەرفەتێکی گرنگە بۆ ئەو وڵات و هەرێمانەی کە دەخوازن سیستەمی پەروەردەی خۆیان باشتر بکەن.