وەزارەتی گواستنەوە: کەشتییەکی پەنەمایی لە عێراق پێکرا
وەزارەتی گواستنەوەی عێراق رایگەیاند، کەشتییەکی گواستنەوەی سووتەمەنی لە نێو ئاوە هەرێمییەکانی عێراق لە لایەن سەرچاوەیەکی نادیارەوە کرایە ئامانج، بەڵام هیچ زیانێکی گیانی و ژینگەیی لێ نەکەوتووەتەوە.
وەزارەتی گواستنەوەی عێراق لە راگەیەنراوێکدا ئاماژەی بەوە دا، کاتژمێر 05:30 خولەکی بەرەبەیانی ئەمڕۆ چوارشەممە، 9ـی ئەیلوولی 2026، کەشتییەکی تایبەت بە گواستنەوەی سووتەمەنی کە ئاڵای وڵاتی پەنەمای بەرز کردبووەوە، لە نێو ئاوە هەرێمییەکانی عێراقدا لە لایەن سەرچاوەیەکی نادیارەوە پێکرا. ئەمەش بووە هۆی دروستبوونی زیانی ماددی لە دیواری دەرەوەی کەشتییەکەدا.
وەزارەتەکە ئەوەی خستەڕوو، رووداوەکە هیچ زیانێکی گیانی لە نێو تیمەکانی کەشتییەکەدا لێ نەکەوتووەتەوە، هەروەها هیچ دزەکردنێکی سووتەمەنی بۆ نێو ئاوەکە رووی نەداوە و سەلامەتیی ژینگە پارێزراوە.
لە بەشێکی دیکەی راگەیەنراوەکەدا هاتووە، دەستبەجێ دوای رووداوەکە، لایەنە ئەمنی و فەرمی و دەریاییەکان دەستیان بە گرتنەبەری رێکارە پێویستەکان کردووە. کەشتییەکە جیا کراوەتەوە و خراوەتە ژێر چاودێریی بەردەوام، هاوکات چاودێریی مەیدانیی ناوچەکانی دەوروبەری دەکرێت بۆ دڵنیابوونەوە لە نەبوونی دزەکردنی سووتەمەنی یان مەترسی لەسەر سەلامەتیی هاتوچۆی دەریایی لە ناوچەکەدا.
لە کۆتاییدا وەزارەتی گواستنەوە باسی لەوە کرد، لایەنە پەیوەندیدارەکان بە وردی لێکۆڵینەوە لە هۆکارەکان و سەرچاوەی هێرشەکە دەکەن، لە داهاتووشدا هەر زانیارییەکی نوێ و پشتڕاستکراوە هەبێت بڵاوی دەکەنەوە.
ئاوە هەرێمییەکانی عێراق دەکەونە باکووری کەنداوی عەرەبی و بە یەکێک لە ناوچە ستراتیژییە گرنگەکان بۆ ئاڵوگۆڕی بازرگانی و هەناردەکردنی وزە دادەنرێن. رۆژانە چەندین کەشتیی گەورەی بارهەڵگر و تانکەری نەوت لەم رێڕەوە ئاوییەوە هاتوچۆ دەکەن بۆ گواستنەوەی کاڵا و سووتەمەنی لە بەندەرەکانی بەسرە و ئوم قەسرەوە بۆ بازاڕەکانی جیهان.
پاراستنی ئاسایشی دەریایی لەم ناوچەیەدا ئەرکێکی سەرەکیی هێزە دەریاییەکانی عێراقە، چونکە داهاتی عێراق بە رێژەیەکی زۆر پشتی بە فرۆشتنی نەوت لەرێگەی ئەم بەندەرانەوە بەستووە. لە ماوەی ساڵانی رابردوودا بەهۆی ململانێ هەرێمییەکان و گرژییەکانی ناوچەکە، زۆرجار مەترسی بۆ سەر جووڵەی کەشتییە بازرگانییەکان دروست بووە، هەرچەندە ئاوەکانی عێراق بە بەراورد بە شوێنەکانی دیکە کەمتر تووشی رووداوی لەم شێوەیە بوون.
بەئامانجگرتنی کەشتییە نەوتهەڵگرەکان مەترسییەکی گەورەیە بۆ سەر ژینگەش، چونکە هەر تەقینەوە یان دزەکردنێکی سووتەمەنی دەتوانێت زیانێکی گەورە بە سامانی ماسی و ئاوی ناوچەکە بگەیەنێت و پرۆسەی پاککردنەوەشی کات و تێچوویەکی زۆری دەوێت، بۆیە دەستبەجێ دوای هەر رووداوێک تیمەکانی فریاگوزاریی دەریایی رێکاری خێرا دەگرنەبەر بۆ رێگریکردن لە کارەساتی ژینگەیی.