کەشناسیی عێراق: پلەکانی گەرما نزمدەبنەوە و خۆڵبارین دەستپێدەکات

بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان و دەستەی کەشناسیی عێراق، پێشبینییەکانی کەشوهەوای چەند رۆژی داهاتوویان بڵاوکردەوە و، ئاماژە بە دابەزینی پلەکانی گەرما لە کوردستان و دروستبوونی شەپۆلێکی خۆڵبارین لە ناوەڕاستی عێراق دەدەن.

ئەمڕۆ سێشەممە، 15ـی ئەیلوولی 2026، بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان باری کەشوهەوای 48 کاتژمێری داهاتووی راگەیاند. بەپێی پێشبینییەکان، ئاسمان ساماڵ دەبێت و لە ئێوارەدا لە ناوچە شاخاوییەکان دەگۆڕێت بۆ نیمچەهەور. خێرایی با لەسەرخۆ بۆ مامناوەند دەبێت (لە نێوان 10 بۆ 20 کیلۆمەتر لە کاتژمێرێکدا) و مەودای بینین لە نێوان نۆ بۆ 10 کیلۆمەتر دەبێت، هاوکات پلەکانی گەرما کەمێک نزم دەبنەوە. بۆ رۆژی چوارشەممەش، 16ــی ئەیلوول، ئاسمان ساماڵ دەبێت و پلەکانی گەرما نزیک دەبن لە تۆمارەکانی ئەمڕۆ.

بەرزترین پلەکانی گەرمای پێشبینیکراو بۆ سبەی چوارشەممە، 16ـی ئەیلوول، لە شارەکانی هەرێمی کوردستان بەم شێوەیە دەبن: هەولێر 37، پیرمام 34، سلێمانی 35، هەڵەبجە 37، چەمچەماڵ 38، دهۆک 36، زاخۆ 37، ئاکرێ 37، گەرمیان 41، و حاجی ئۆمەران 24 پلەی سیلیزی.

لە لایەکی دیکەوە، دەستەی کەشناسیی عێراق پێشبینی دەکات رۆژانی چوارشەممە و پێنجشەممە ئاسمان ساماڵ بێت. لەبارەی رۆژی هەینی، 18ـی ئەیلوول، دەستەکە رایگەیاند، ئاسمان ساماڵ دەبێت، بەڵام دوای نیوەڕۆ لە ناوچەکانی باشوور دەبێتە پەڵەهەور. هاوکات لە ناوچەکانی ناوەڕاستیش لە دوای نیوەڕۆوە خۆڵبارین دروست دەبێت و پلەکانی گەرما نزم دەبنەوە. سەبارەت بە رۆژی شەممەش، پلەکانی گەرما لە سەرانسەری وڵات روو لە دابەزین دەکەن.

دەستەی کەشناسیی عێراق پلەکانی گەرمای بۆ رۆژی چوارشەممە لە پارێزگاکانی عێراق ئاشکرا کرد، بە جۆرێک لە بەغدا، دیالە و کەربەلا 42 پلە دەبێت، ئەنبار 41 پلە، کەرکووک 40 پلە، واست، بابل و نەجەف 43 پلە، دیوانییە و موسەننا 44 پلە، هەروەها گەرمترین ناوچەکانیش میسان، زیقار و بەسرە دەبن بە 45 پلەی سیلیزی.

مانگی ئەیلوول لە عێراق و هەرێمی کوردستان بە مانگی گواستنەوەی وەرزەکان دادەنرێت، تێیدا کەشوهەوا لە وەرزی هاوینی گەرم و وشکەوە وردە وردە بەرەو وەرزی پاییز و فێنکبوون دەڕوات. لەم مانگەدا گۆڕانکاریی خێرا لە پلەکانی گەرما و ئاراستەی بادا دروست دەبێت.