وەزیری دەرەوەی پۆڵەندا: ئەگەر رووسیا هێرشمان بکاتەسەر دەیبەزێنین

رادۆسلاف سیکۆرسکی، وەزیری دەرەوە و جێگری سەرۆکوەزیرانی پۆڵەندا، لە کۆنفرانسێکی ئەمنیدا لە کیێڤ هۆشدارییەکی توندی دایە ڤلادیمێر پۆتین و رایگەیاند، لە هەبوونی هەر رووبەڕووبوونەوەیەکی سەربازی لەگەڵ ناتۆدا، هێزەکانی هاوپەیمانییەکە لە ماوەی شەش هەفتەدا رووسیا تێکدەشکێنن؛ لە بەرامبەردا وەزارەتی دەرەوەی رووسیا وەڵامی دایەوە.

لە میانی کۆنفرانسەکەدا لە کیێڤ، سیکۆرسکی جەختی کردەوە کە ناتۆ لە رووی هێزی ئاسمانییەوە باڵادەستییەکی رەهای بەسەر رووسیادا هەیە. ناوبراو ئاماژەی بەوەش کرد، ئەگەر ئۆکرانییەکان لە ماوەی شەش مانگدا نیوەی توانای پاڵاوگەکانی رووسیایان پەکخستبێت، ئەوا هێزەکانی ناتۆ دەتوانن لە ماوەی شەش هەفتەدا نیوەکەی دیکەشی بە تەواوی لەناو ببەن.

ئەم قسانەی سیکۆرسکی کاردانەوەی بەدوای خۆیدا هێنا؛ ماریا زاخارۆڤا، گوتەبێژی وەزارەتی دەرەوەی رووسیا بە توندی وەڵامی دایەوە و لێدوانەکانی وەزیری دەرەوەی پۆڵەندای بە هەبوونی "ترس و رکی بەردەوام لە رووسیا (رووسۆفۆبیا)" وەسف کرد.

ئەمەش لە کاتێکدایە کە ناوچەکە رووبەڕووی چەندین رووداوی ئەمنی بووەتەوە؛ لە ساڵی 2022دا مووشەکێکی بەرگریی ئاسمانی کەوتە نێو خاکی پۆڵەندا و بووە هۆی گیانلەدەستدانی دوو هاووڵاتی پۆڵەندی، هەروەها لە ئەیلوولی 2025دا 19 درۆنی رووسی چوونە نێو پۆڵەنداوە. جگە لەوەش، لە هەمان مانگدا سێ فڕۆکەی جەنگیی رووسیا بۆ ماوەی 10 خولەک ئاسمانی ئەستۆنیایان بەزاند.

هاوکات رووداوی هاوشێوە لە وڵاتانی فینلەندا، لیتوانیا، نۆروێژ و رۆمانیا تۆمارکراون. لە لایەکی دیکەوە، دەزگا ئەمنییەکانی ناتۆ موسکۆ تۆمەتبار دەکەن بە هێرشی سایبەری، تێکدان و مەشقکردن بۆ تێکدانی کێبڵە ژێرئاوەکان لە نۆروێژ.