سەرۆک بارزانی: پێویستە بە دەستوور هەموو کێشەکان چارەسەر بکرێن
ئەمڕۆ سێشەممە، 29ی ئەیلوولی 2026، سەرۆک مەسعود بارزانی پێشوازی لە کەسایەتیی دیاری بەریتانی و سەرۆکی فەخریی یەکێتیی نیودەوڵەتیی دیموکرات (IDU) لۆرد مایکل ئاشکرۆفت کرد.
بە گوێرەی راگەیەنراوی بارەگای بارزانی، لە دیدارەکەدا لۆرد ئاشکرۆفت خۆشحاڵیی خۆی بۆ سەردانی بۆ هەرێمی کوردستان دەربڕی و پێزانینی هەبوو بۆ ئەو هەنگاوانەی بە ئاراستەی بووژانەوە و سەقامگیری و پێشکەوتنی هەرێمی کوردستان نراوە و جەختیشی لەوە کردەوە، پێویستە واقعی هەرێمی کوردستان و دۆزی کورد لەسەر ئاستی جیهانیدا باشتر بناسرێت و قوربانیدانی هێزی پێشمەرگەی کوردستانی لە شەڕی تیرۆریستانی داعش بەرز نرخاند.
هەر لەو دیدارەدا سەرۆک بارزانی بە گەرمی بەخێرهاتنی لۆرد ئاشکرۆفتی کرد. هەروەها کورتەیەکی لەبارەی مێژووی خەبات و قوربانیدانی گەلی کوردستان لە سەد ساڵی ڕابردوو خستەڕوو .
هەروەها ئاماژەی بە فەرهەنگی دەوڵەمەندی پێکەوەژیانی گەلی کوردستان دا و جەختی لە پێویستیی چارەسەرکردنی دۆزی رەوای گەلی کوردستان لەڕێی گفتوگۆ و شێوازی ئاشتیانە کردەوە. لە بەشێکی تری گوتەکانیدا سەرۆک بارزانی رۆشنایی خستەسەر بارودۆخی عێراق و تەئکیدی لە پابەندبوونی هەموو لایەک بە دەستوور کردەوە لەپێناو سەقامگیری و چارەسەرکردنی کێشەکان.