ئەڵمانیا بۆ کوردستان24: کشانەوەی هێزەکان پەیوەندییەکانمان لەگەڵ هەرێمی کوردستان و عێراق ناپچڕێنێت

سەرچاوەیەک لە وەزارەتی دەرەوەی ئەڵمانیا لە بارەی کشانەوەی هێزەکانی هاوپەیمانان رایگەیاند، بەرلین رێز لە خواستی عێراق دەگرێت، بەڵام ئەمە بە مانای کۆتاییهاتنی پەیوەندییەکان نایەت، بەڵکو بە فۆڕمێکی نوێ و گونجاو بەردەوام دەبن لە پاڵپشتیکردنی کەرتی ئەمنی و سەقامگیری لە هەرێمی کوردستان و عێراق دا.

پێنجشەممە 1 تشرینی یەکەمی 2026، سەرچاوەیەک لە وەزارەتی دەرەوەی ئەڵمانیا لە وەڵامی پرسیاری کوردستان24 سەبارەت بە کشانەوەی هێزە بیانییەکان و پەیوەندییەکانی بەرلین لەگەڵ هەرێمی کوردستان و عێراق، جەختی لەوە کردووەتەوە کە رێز لە بڕیار و خواستی دەوڵەتی عێراق دەگرن بۆ کشانەوەی هێزە نێودەوڵەتییەکان، بەڵام هاوبەشییەکانی نێوان هەردوولا بەردەوام دەبێت.

سەرچاوەکە ئاشکرای کرد: لە بەرژەوەندیی هاوبەشی هەردوولادایە کە ئامادەیی و رۆڵی ئەڵمانیا لە عێراقدا، بەتایبەت لە هەرێمی کوردستان، بە فۆڕمێکی نوێ و گونجێنراو درێژەی پێبدرێت؛ ئەمەش لە رێگەی بەردەوامیی پشتیوانیکردنی کەرتی ئەمنی، هەوڵە مەدەنییەکان بۆ سەقامگیری و هاوکارییەکانی بواری گەشەپێدان.

هەروەها ئاماژە بەوە دا کە ئەم پرسە تەوەرێکی سەرەکیی گفتوگۆکانی سەردانەکەی 15ی ئەیلوولی عەلی زەیدی، سەرۆکوەزیرانی عێراق بووە بۆ بەرلین لەسەر بانگهێشتی فەرمیی فرێدریک مێرتس، ڕاوێژکاری ئەڵمانیا، و ئێستاش گفتوگۆ لەگەڵ هاوبەشە عێراقییەکان بەردەوامە بۆ داڕشتنی وردەکاریی شێوازی هاوکارییەکان لە قۆناخی داهاتوودا.

سەبارەت بە دۆخی مەیدانیی ڕێکخراوی داعش، سەرچاوەکەی وەزارەتی دەرەوەی ئەڵمانیا باسی لەوە کرد، داعش لە عێراق بە تەواوی لاواز بووە و لەسەر زەوی کۆتایی هاتووە و پەلامارەکانی کەمبوونەتەوە، لە بەرامبەردا هاوبەشە کوردەکان و هێزەکانی حکوومەتی فیدراڵ رۆژ بە رۆژ توانای ئەوەیان بەهێزتر دەبێت کە بە شێوەیەکی سەربەخۆ رووبەڕووی پاشماوەکانی داعش ببنەوە، هەرچەندە بۆ پاراستنی ئەو دەستکەوتانە هێشتا پێویستی بە هەماهەنگیی بەردەوام هەیە.