گوتەبێژی سوپای پاکستان: هێزەکانمان لە سعوودیەن

گوتەبێژی فەرمیی سوپای پاکستان پشتڕاستی کردەوە، هێزەکانی وڵاتەکەی بە فەرمی لە ناو خاکی سعوودیەن؛ ئاشکرای کرد، دروستبوونی هاوپەیمانیی بەرگریی مەککە لە خۆڕایی نەبووە، بەڵکو درێژکراوەی دەیان ساڵ هاوبەشیی ستراتیژی و سەربازیی نێوان ئیسلامئاباد، ریاز و ئەنقەرەیە.

چوارشەممە 7ـی تشرینی یەکەمی 2026، لیوا ئەحمەد شەریف چاودری، گوتەبێژی سەربازیی سوپای پاکستان، لە چاوپێکەوتنێکدا لەگەڵ کەناڵی سی ئێن ئێنی ئەمریکی ئاشکرای کرد کە سەرباز و کەرەستە سەربازییەکانی پاکستان لە چەندین بواری جۆراوجۆر و پسپۆڕیی بەرگریدا ئێستا لە ناو خاکی سعوودیە جێگیرن و بەشدارن لە ئەرکە ئەمنییەکاندا.

لە وەڵامی پرسیارێکدا سەبارەت بە جێگیرکردنی سەربازانی وڵاتەکەی لە چوارچێوەی هاوپەیمانیی مەککە، لیوا چاودری گوتی: ئامادەیی هێزەکانی پاکستان لە سعوودیە مێژوویەکی دەیان ساڵەی هەیە؛ بەدرێژایی دەیان ساڵ هێزەکانمان بە توانست و ئەزموونی جیاوازەوە لە سعوودیە بوون. هاوپەیمانیی مەککە شتێک نییە لە خۆڕایی هاتبێتە ئاراوە، بەڵکو لەسەر بنەمای پەیوەندییەکی بەردەوامی دیپلۆماسی، سیاسی، سەربازی و کولتووری لەنێوان گەل و دەوڵەتەکانی پاکستان، سعوودیە و تورکیادا بنیات نراوە.

گوتەبێژی سوپای پاکستان دووپاتی کردەوە، ئیسلامئاباد بەردەوام دەبێت لە پاڵپشتیکردنی هاوبەشەکانی و هێزەکانیان لە تەواوی بوارە سەربازییەکاندا لەگەڵ سوپای سعوودیە هاوئاهەنگن بۆ رووبەڕووبوونەوەی هەر مەترسی و ئاڵنگارییەکی ئەمنی.

ئەم لێدوانەی گوتەبێژی سەربازیی پاکستان دوای ئەوە دێت کە رۆژی رابردوو هەریەک لە سعوودیە، تورکیا و پاکستان لە کۆبوونەوەیەکی بەپەلەدا لە ریاز رایانگەیاندبوو، بەندی بەرگریی هاوبەشی پەیماننامەی مەککە دەخەنە بواری جێبەجێکردنەوە، بە مەبەستی رێگریکردن لە هێرشە مووشەکی و درۆنییەکانی حووسییەکان کە فڕۆکەخانە و دامەزراوە نەوتییەکانی سعوودیەیان کردووەتە ئامانج.