کەشتییەکی نەوتهەڵگر لە باکووری قەتەر کرایە ئامانج

دەستەی ئۆپەراسیۆنە بازرگانییە دەریاییەکانی بەریتانیا (UKMTO) رایگەیاند، ئێوارەی چوارشەممە، زانیارییان پێگەیشتووە کەشتییەکی نەوتهەڵگر لە دووری نزیکەی 51 میل لە باکووری قەتەر کراوەتە ئامانجی چەند مووشەکێک، بەو هۆیەوە ژمارەیەک کەس بریندار بوون.

دەستەکە روونیکردەوە، زانیارییان پێگەیشتووە رووداوەکە برینداری لێکەوتووەتەوە. هاوکات بەرپرسانی خۆجێیی سەرقاڵی لێکۆڵینەوەن و تا ئێستا ناسنامەی کەشتییەکە ئاشکرا نەکراوە.

رووداوەکە دوێنێ چوارشەممە لە نزیکەی 300 میل (500 کیلۆمەتر) لە گەرووی هورمز روویدا. ئەم ناوچەیە لە سایەی جەنگی رۆژهەڵاتی ناوەڕاست بووەتە شوێنی رووبەڕووبوونەوەی ژمارەیەک کەشتی لەگەڵ هێرشەکان.

ئەم رێڕەوە دەریاییە کە پێش جەنگ پێنج بەشی وزەی جیهانی پێیدا تێپەڕ دەبوو، ئێستا بووەتە چەقی ململانێکانی رۆژهەڵاتی ناوەڕاست؛ ململانێیەک کە کۆتایی شوباتی رابردوو بە هێرشی ئەمریکا و ئیسرائیل بۆ سەر ئێران سەریهەڵدا.

تاران لەو کاتەوە هاتوچۆی لە گەرووەکەدا سنووردار کردووە و هێرش دەکاتە سەر ئەو کەشتییانەی بەبێ مۆڵەتی ئەو پێیدا تێپەڕ دەبن. واشنتن لە وەڵامی پەکخستنی هاتوچۆ لەلایەن ئێران، گەمارۆی خستووەتە سەر بەندەرەکانی ئێران و کەشتییە جەنگییەکانی بەردەوام هاوڕێیەتیی ئەو نەوتهەڵگرانە دەکەن کە بە گەرووی هورمزدا تێپەڕ دەبن. 

داتاکانی کۆمپانیا تایبەتمەندەکانی شیکاری دەریدەخەن، ژمارەی بارەکانی گازی سروشتیی شل کە لە مانگی ئەیلوولدا بە گەرووی هورمزدا تێپەڕیون، سەرەڕای بەردەوامیی نیگەرانییە ئەمنییەکان و دۆخی نادیار، بۆ بەرزترین ئاستی مانگانە لە دوای دەستپێکردنی جەنگی ئەمریکا و ئیسرائیل دژی ئێران بەرز بووەتەوە.

کۆمپانیای ستاندارد ئاند پوورز گلۆبال ئینەرجی رایگەیاند، لە مانگی ئەیلولدا 19 باری گازی سروشتیی شل بەو رێڕەوە دەریاییەدا تێپەڕیون، کە 13 باریان لە قەتەر و شەش باریشیان لە ئیماراتەوە بوون. داتاکانی کۆمپانیای کەپلەر-یش دەریدەخەن، لە هەمان مانگدا 21 باری گازی سروشتیی شل بە گەرووی هورمزدا تێپەڕیون.

ئێریک یەپ، گەورە شیکار لە ستاندارد ئاند پوورز گوتی: "ئەم ژمارەیە بەراورد دەکرێت بە 15 بار لە مانگی حوزەیراندا، کاتێک رێککەوتنێک لە نێوان ویلایەتە یەکگرتووەکان و ئێران چووە بواری جێبەجێکردنەوە".

یەپ روونیکردەوە، هاتوچۆی گواستنەوەی بارەکانی گازی سروشتیی شل بە گەرووی هورمزدا لە نیوەی دووەمی ئەیلولدا خێرا بووە. ئەگەر ئەم ئاراستەیە لە مانگی تشرینی یەکەمدا بەردەوام بێت، رەنگە چاکبوونەوەی کۆی گشتیی گواستنەوەی مانگانە بۆ 25%ـی ئاستەکانی پێش جەنگ ببینین.