پێشانگای نێودەوڵەتیی کتێبی هەولێر بە دروشمی "من کوردستانیم" دەکرێتەوە

21ـی تشرینی یەکەمی داهاتوو، چالاکییەکانی خولی 18ـەمی پێشانگای نێودەوڵەتیی هەولێر بۆ کتێب دەست پێدەکات. ئەم پێشانگایە لەلایەن دەزگای مەدا بۆ راگەیاندن و رۆشنبیری و هونەر، بە هاوکاریی وەزارەتی رۆشنبیری و لاوانی هەرێمی کوردستان و یەکێتیی نووسەران و ئەدیبانی عێراق و بە هەماهەنگی لەگەڵ کۆمەڵەی پەخشکاران و نووسەرانی عێراق و بە چاودێریی مەسعود بارزانی رێکدەخرێت.

پێشانگاکە تا 31ـی هەمان مانگ لە پێشانگای نێودەوڵەتیی هەولێر لە پارکی سامی عەبدولڕەحمان بەردەوام دەبێت.

خولی ئەمساڵ بە دروشمی "من کوردستانیم" بەڕێوەدەچێت. زیاتر لە 400 دەزگای چاپ و پەخش لە 18 وڵاتەوە بەشداری تێدا دەکەن و زیاتر لە یەک ملیۆن ناونیشان لە بوارە جیاجیاکانی ئەدەب و هزر و مەعریفەدا دەخەنە روو. بەرهەمەکان بە زمانەکانی عەرەبی و کوردی بە شێوەزارە جیاوازەکانییەوە، هەروەها ئینگلیزی و فەرەنسی و ئەڵمانی و فارسی و تورکی و چەند زمانێکی دیکە پێشکەش دەکرێن.

دروشمی "من کوردستانیم" لە روانگەیەکی رۆشنبیرییەوە سەرچاوەی گرتووە کە رێز لە شوناسی کوردی دەگرێت. ئەم شوناسە وەک پێکهاتەیەکی شارستانیی کراوە سەیر دەکرێت کە بنەماکانی خۆی لە مێژوو و زمان و بیرەوەری و ئەدەب و جلوبەرگ و مۆسیقا و هونەرەکانەوە وەردەگرێت و هاوکات بەهاکانی پێکەوەژیان و فرەچەشنی و کرانەوە بەڕووی ئەوانی دیکەدا دەچەسپێنێت.

ئەم دروشمە گوزارشت لە شانازیکردن بە ئینتیماوە دەکات وەک بەهایەکی رۆشنبیری و مرۆیی و پردێک بۆ دیالۆگ و پەیوەندی لەنێوان کولتوورەکاندا. هەروەها هەوڵدەدات وێنەیەکی هاوچەرخی کولتووری کوردی بخاتە روو کە تایبەتمەندییە مێژووییەکەی لەگەڵ کارلێککردنی لەگەڵ دەوروبەرە عێراقی و هەرێمی و جیهانییەکەیدا کۆ دەکاتەوە.

پێشانگاکە لە رێگەی کەمپەینێکی رۆشنبیری و هونەرییەوە کە یاوەری چالاکییەکانی خولەکەیە، ئەم دروشمە بەرجەستە دەکات. لەم کەمپەینەدا دەقی ئەدەبی و شیعری و هونەرە بینراوەکان و دیزاین و وێنەی فۆتۆگرافی و نمایشە کولتوورییەکان و گفتوگۆ هزرییەکان بەکاردەهێنرێن تا سەردانیکەران ئاشنای توخمەکانی شوناسی کوردی بن.

پێشانگای نێودەوڵەتیی هەولێر بۆ کتێب یەکێکە لە دیارترین رووداوە رۆشنبیری و جەماوەرییەکان لە هەرێمی کوردستان و عێراق. پێشانگاکە فەزایەکی فراوان پێکدەهێنێت کە پەخشکاران و نووسەران و رۆشنبیران و خوێنەران کۆدەکاتەوە و رێز لە فرەچەشنیی کولتووری و زمانەوانی و کرانەوە بەڕووی ئەزموونە هزری و ئەدەبییەکاندا دەگرێت.

دەزگاکانی چاپ و بڵاوکردنەوەی بەشداربوو لە رۆژانی پێشانگاکەدا داشکاندنی زیاتر لە 50%ـی بۆ کۆمەڵەیەکی بەرفراوان لە کتێب و بڵاوکراوەکان پێشکەش دەکەن. ئەمەش دەرفەت بە خوێنەران دەدات ناونیشانە نوێ و هەمەجۆرەکان بە نرخی داشکێندراو بەدەست بهێنن.

بەرنامەی رۆشنبیری و هونەریی پێشانگاکە زیاتر لە 90 چالاکی لەخۆدەگرێت، لەوانە کۆڕی هزری و ئەدەبی و دانیشتنی گفتوگۆئامێز و دیدار لەگەڵ نووسەران و رۆشنبیران، شانبەشانی ئاهەنگ و چالاکییە مۆسیقییەکان بە چەندین زمان.

پێشانگای نێودەوڵەتیی هەولێر بۆ کتێب لە 21 تا 31ـی تشرینی یەکەمی 2026، رۆژانە لە کاتژمێر 10ـی بەیانی تا 8ـی ئێوارە بەڕووی سەردانکەراندا کراوە دەبێت. کارگێڕیی پێشانگاکە بانگهێشتی جەماوەری خوێنەران و ئارەزوومەندانی رۆشنبیری و ئەدەب و هونەر دەکات بۆ سەردانیکردنی پێشانگاکە و بەشداریکردن لە چالاکییەکانیدا.