سەرەڕای ئاڵۆزییە هەرێمییەکان؛ داهاتی گەشتیاریی تورکیا زیادی کردووە

وەزارەتی رۆشنبیری و گەشتوگوزاری تورکیا رایگەیاند: لە ماوەی نۆ مانگی ئەمساڵدا، داهاتی کەرتی گەشتیاریی وڵاتەکە 51 ملیار دۆلاری تێپەڕاندووە، هاوکات پێشوازی لە زیاتر لە 49 ملیۆن گەشتیار کراوە، ئەمەش نیشانەی بەردەوامیی گەشەی ئەم سێکتەرە گرنگەی ئابوورییە.

هەینی، 30ـی تشرینی یەکەمی 2026، بە پێی ئەو داتا و ئامارە فەرمییانەی کە لە لایەن محەمەد نوری، وەزیری رۆشنبیری و گەشتوگوزاری تورکیاوە خراونەتەڕوو، داهاتی کەرتی گەشتیاری لە نۆ مانگی یەکەمی ئەمساڵدا گەیشتووەتە 51 ملیار و 278 ملیۆن دۆلار، کە ئەمەش بەراورد بە هەمان ماوەی ساڵی رابردوو گەشەیەکی بە رێژەی 2.4% تۆمار کردووە.

لە راپۆرتەکەی وەزارەتەکەدا هاتووە، لەو ماوەیەدا تورکیا پێشوازی لە نزیکەی 49 ملیۆن و 100 هەزار گەشتیار کردووە؛ لە رووی نەتەوەییشەوە، گەشتیارانی رووسیا لە پلەی یەکەمی سەردانیکەراندا بوون و بە دوای ئەوانیشدا هاووڵاتییانی ئەڵمانیا لە پلەی دووەم و بەریتانییەکان لە پلەی سێیەمدا هاتوون.

لە بەشێکی دیکەی داتاکاندا هاتووە، کە داهاتی کەرتی گەشتیاری لە چارەکی سێیەمی ئەمساڵدا (تەممووز، ئاب و ئەیلوول) گەیشتووەتە 25.5 ملیار دۆلار بە تۆمارکردنی گەشەی 5%؛ هاوکات تێکڕای خەرجیی یەک گەشتیار بۆ هەر شەوێک لە تورکیا بۆ 107.7 دۆلار بەرزبووەتەوە، کە ئەمەش بەراورد بە ساڵی پێشوو بە رێژەی 4.6% زیادی کردووە.

وەزارەتی رۆشنبیری و گەشتوگوزاری تورکیا دووپاتی کردەوە، کە کەرتی گەشتیاری توانیویەتی ئەم دەستکەوتە گەورانە بەدەستبهێنێت سەرەڕای ئەو ئاڵنگارییە ئاڵۆزانەی کە بەهۆی گرژییە ئەمنییەکانی ناوچەکە و بەرزبوونەوەی تێچووی کەرتی گواستنەوەی ئاسمانییەوە هاتوونەتە ئاراوە.