پلەکانی گەرما نزم دەبنەوە

بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان، پێشبینییەکانی کەشوهەوای 48 کاتژمێری داهاتووی بڵاوکردەوە.

ئەمڕۆ دووشەممە 2ـی تشرینی دووەمی 2026،  ئاسمان بەگشتی هەوری تەواو دەبێت و نمەباران لە زۆربەی ناوچەکانی هەرێمی کوردستان دەبارێت، کە هەندێک جار بۆ تاوەباران و بروسکە دەگۆڕێت. کاریگەریی دابارین لە کاتەکانی بەیانی تا نیوەڕۆ لە ناوچەکانی بادینان و سنووری پارێزگای هەولێر زیاتر دەبێت، پاشان کاریگەرییەکەی بەرەو ناوچەکانی رۆژهەڵات و سنووری پارێزگاکانی سلێمانی و هەڵەبجە لاواز دەبێت و تا کاتەکانی شەو بەشێوەی پچڕپچڕ بەردەوام دەبێت. دوای ئەو ماوەیە کەش سەقامگیر دەبێتەوە و ئاسمان بۆ ساماڵ و پەڵەهەور دەگۆڕێت.

خێرایی با لەسەرخۆ بۆ مامناوەند دەبێت و لە نێوان 5 بۆ 20 کیلۆمەتر لە کاتژمێرێکدا دەبێت، ئاراستەی باکیش لە باکووری رۆژهەڵات بۆ باکووری رۆژئاوا دەگۆڕێت. مەودای بینین لە نێوان 7 بۆ 9 کیلۆمەتر دەبێت و پلەکانی گەرما بەراورد بە تۆمارەکانی دوێنێ، 2 بۆ 3 پلە نزم دەبنەوە.