دەروازەی زێت بۆ ماوەیەکی کاتی دادەخرێت

بەڕێوەبەرایەتیی دەروازەی نێودەوڵەتیی زێت رایگەیاند، بەهۆی کاری چاککردنەوە و نوێکردنەوەی رێگاوبانەکان لەلایەن تورکیاوە، هاتوچۆی گەشتیاران لە دەروازەکەدا بۆ ماوەی یەک رۆژ رادەگیرێت.

ئەمڕۆ سێشەممە، 3ـی تشرینی دووەمی 2026، بەڕێوەبەرایەتیی دەروازەی نێودەوڵەتیی زێت ئاگاداری هاووڵاتییانی کردەوە و رایگەیاند، سبەی چوارشەممە 4ـی تشرینی دووەمی 2026، سەرجەم جموجۆڵی گەشتیاری و هاتوچۆ لە سنووری دەروازەی نێودەوڵەتیی زێت رادەگیرێت.

ئاماژەی بەوەش دا، ئەو رێکارە لە وەڵامی داوایەکی دەروازەی دەرەجیکی تورکیا و بەهۆی بەردەوامیی پرۆسەی نۆژەنکردنەوەی رێگاوبانەکان لەلایەن تورکیاوە جێبەجێ دەکرێت، هاوکات سەرجەم کار و چالاکییەکانی دەروازەی نێودەوڵەتیی زێت بە شێوەی ئاسایی بەردەوام دەبن.

بەپێی بەرنامەی دیاریکراو، پێنجشەممە 5ـی تشرینی دووەمی 2026، هاتوچۆ و گەشتکردن لە دەروازەکەدا دەست پێ دەکاتەوە.

بەڕێوەبەرایەتیی دەروازەکە داوا لە هاووڵاتیان و گەشتیاران دەکات، وادەی گەشتەکانیان لەگەڵ ئەم گۆڕانکارییە بگونجێنن و گەشتەکانیان بۆ پێنجشەممە رێک بخەن.