ئاژانسی فرانس پرێس ڕایانگەیاند دەنگی پێنج تەقینەوەی بەهێز لە ناوەندی شاری بەغدا بیستراوە، ڕێک لەو ناوچەیەی کە باڵیۆزخانەی ویلایەتە یەکگرتووەکانی ئەمریکای لێیە. ئەم هێرشە هاوکاتە لەگەڵ نزیکبوونەوەی کاتژمێری سفر بۆ کۆتاییهاتنی مۆڵەتەکەی دۆناڵد ترەمپ بۆ سەر تاران.

لە دوای دەستپێکردنی جەنگی ئەمریکا-ئیسرائیل دژی ئێران، باڵیۆزخانەی ئەمریکا و ناوەندی دیپلۆماسی و لۆجستیی هێزەکانی ئەمریکا لە فڕۆکەخانەی نێودەوڵەتیی بەغدا، چەندین جار بوونەتە ئامانجی مووشەک و فڕۆکەی بێفڕۆکەوانی گرووپە چەکدارە هاوپەیمانەکانی تاران. زۆربەی ئەم هێرشانە لە لایەن سیستەمەکانی بەرگریی ئاسمانییەوە لە ئاسماندا تەقێنراونەتەوە و پووچەڵ کراونەتەوە.

نوێنەری کۆماری ئیسلامیی ئێران لە نەتەوەیەکگرتووەکان لە کۆبوونەوەی ئەنجومەنی ئاسایش تایبەت بە گەرووی هورمز رایگەیاند، هەڕەشەکانی سەرۆکی ئەمریکا سەبارەت بە سڕینەوەی شارستانییەتی ئێران مایەی نیگەرانییە. 

ئەمڕۆ سێشەممە، 7ـی نیسانی 2026، ئەمیر سەعید ئیرەوانی، باڵیۆزی ئێران لە نەتەوە یەکگرتووەکان رایگەیاند، "ئەمڕۆ سەرۆکی ویلایەتە یەکگرتووەکانی ئەمریکا جارێکی دیکە پەنای بردووەتە بەر زمانێک کە نەک هەر بە قووڵی نابەرپرسانەیە، بەڵکوو بە شێوەیەکی مەترسیدار جێگەی نیگەرانییە، کاتێک رایگەیاند کە 'تەواوی شارستانییەت ئەمشەو لەناو دەچێت و هەرگیز ناگەڕێتەوە."

کەمێک پێش ئێستا، پەیامنێری کوردستان24 لە هەولێر رایگەیاند: درۆنێک لە ئاسمانی هەولێر تێکشکێنرا.

سوپای ئیسرائیل هۆشدارییەکی بەپەلەی بڵاو کردەوە و سەرجەم هێزە بەرگرییە ئاسمانییەکانی خستە حاڵەتی ئامادەباشیی تەواوەوە. ئەم بڕیارە دوای هەڵسەنگاندنێکی وردی ئەمنی دێت، کە تێیدا پێشبینی دەکرێت لە کاتژمێرەکانی داهاتوودا ئاستی گرژی و هێرشە مووشەکییەکان بۆ سەر ناوچە جیاوازەکانی ئیسرائیل بە شێوەیەکی بەرچاو بەرز ببێتەوە.

سەرۆکوەزیرانی پاکستان، داوای لە دۆناڵد ترەمپ کرد مۆڵەتەکەی بۆ هێرشکردنە سەر ژێرخانی ئێران بۆ ماوەی دوو هەفتە درێژ بکاتەوە، لە بەرانبەریشدا داوای لە تاران کرد وەک نیشانەی نیازپاکی بۆ هەمان ماوە گەرووی هورمز بکاتەوە; هاوکات واشنتن لە چەند کاتژمێرێکی داهاتوو وەڵامی پێشنیازەکە داتەوە و بەرپرسێکی ئێرانیش دەڵێت: پێداچوونەیەی بۆ دەکەین

کۆشکی سپی رایگەیاند: کە بڕیاری کۆتایی سەبارەت بە چارەنووسی ململانێکان لەگەڵ ئێران تەنیا لای دۆناڵد ترەمپە. ئەمەش لە کاتێکدایە کە نەتەوە یەکگرتووەکان هۆشدارییەکی توند دەدات و رایدەگەیەنێت هەر هێرشێک بۆ سەر ژێرخانی مەدەنی بە "تاوانی جەنگ" ئەژمار دەکرێت.

سەرۆکی دیموکراتەکان لە ئەنجوومەنی نوێنەرانی ئەمریکا، بە فەرمی داوای لە کۆنگرێس کرد، رێگریی بکات لە تێوەگلانی ئەمریکا لە جەنگێکی وێرانکەر کە دەبێتە هۆی لەناوچوونی شارستانییەتێک.

سەرۆکی ئەمریکا جەختی لەوە کردەوە، کە واشنتن بە پێی پلانە سەربازییە داڕێژراوەکان دژی ئێران هەنگاو دەنێت، مەگەر ئەوەی تاران لە کاتژمێرەکانی کۆتایی مۆڵەتەکەدا نەرمییەکی کردەیی لە دانوستانەکاندا نیشان بدات کە هاوکێشەی مۆڵەتەکە بگۆڕێت.

سەرۆکی دیموکراتەکان لە ئەنجوومەنی نوێنەرانی ئەمریکا، بە فەرمی داوای لە کۆنگرێس کرد، رێگریی بکات لە تێوەگلانی ئەمریکا لە جەنگێکی وێرانکەر کە دەبێتە هۆی لەناوچوونی شارستانییەتێک.

بە پێی راپۆرتێکی رۆژنامەی وۆڵ ستریت جۆرناڵ، تاران بڕیاری داوە چیدیکە بە شێوەیەکی راستەوخۆ لەگەڵ واشنتن گفتوگۆ نەکات، ئەوەش دوای ئەوەی سەرۆکی ئەمریکا هەڕەشەی "لەناوبردنی شارستانییەتی ئێران"ی کردبوو، کە ئەم هەنگاوە بووەتە هۆی لەباربردنی هەوڵە دیپلۆماسییەکان.