ئیسماعیل بەقایی، گوتەبێژی وەزارەتی دەرەوەی ئێران رایگەیاند، تێڕوانین و داخوازییەکانی ئێران بە پشتبەستن بە پاکێجی پێشنیارکراوی 10 خاڵی گەیەندرایە لایەنی پاکستانی.

ئەمڕۆ شەممە، 11ـی نیسانی 2026، نووسینگەی شەهباز شەریف، سەرۆکوەزیرانی پاکستان رایگەیاند، سەرۆکوەزیرانی وڵاتەکە لەگەڵ شاندی باڵای دانوستانکاری ئەمریکا، لە ئیسلام کۆبووەوە.

کۆبوونەوەکە دوای دیداری سەرۆکوەزیرانی پاکستان لەگەڵ شاندی باڵای دانوستانکاری ئێرانی لە ئیسلام ئاباد بوو. 

بەپێی راگەیەندراوەکەی نووسینگەی سەرۆکوەزیرانی پاکستان، سەرۆکوەزیران ستایشی پابەندبوونی هەردوو شاندی ئێرانی و ئەمریکیی کردووە، بۆ ئەوەی بە شێوەیەکی بنیاتنەرانە و ئەرێنی بەشداری لە دانوستانەکاندا بکەن.

سێ سەرچاوەی نزیک لە بازنەی بڕیاربەدەستی ئێران بە ئاژانسی ڕۆیتەرزیان راگەیاندووە؛ موجتەبا خامنەیی، رێبەری نوێی ئێران، هێشتا لە قۆناخی چاکبوونەوەدایە دوای ئەوەی لەو هێرشە ئاسمانییەی بووە هۆی کوژرانی باوکی، تووشی برینداریی سەخت بووە.

گوتەبێژی باڵیۆزخانەی چین لە واشنتن، ئەو دەنگۆیانەی رەتکردەوە کە باس لە ناردنی چەک لەلایەن وڵاتەکەیەوە بۆ هەر لایەنێکی ناو ململانێکانی نێوان ئەمریکا و ئێران دەکەن، رایگەیاند: "ئەو زانیارییانەی لەمبارەیەوە بڵاوکراونەتەوە دوورن لە راستییەوە."

ئەمڕۆ شەممە، 11ـی نیسانی 2026، سەرچاوەیەکی باڵای ئێرانی بە ئاژانسی "رۆیتەرز"ـی راگەیاند، ئەمریکا بە فەرمی رازی بووە سەرجەم سەرمایە سڕکراوەکانی تاران ئازاد بکات.

هەروەها سەرچاوەکە ئاماژەی بەوە داوە، پرسی ئازادکردنی ئەو سەرمایانە بە شێوەیەکی راستەوخۆ پەیوەست کراوە بە گرەنتیکردنی تێپەڕبوونی ئارام و سەلامەتیی هاتوچۆی کەشتییەکان بەناو گەرووی هورمزدا.

سەرچاوەکە روونیشی کردەوە، ئێران پێی وایە ئەو هەنگاوەی ئەمریکا وەک نیازپاکێیەکە بۆ ئەوەی بگاتە رێککەوتنی گشتگیر و یەکجارەکی لەگەڵ تاران. 

لە لایەکی دیکەوە تۆڕی هەواڵی "سی ئێن ئێن"ـی ئەمریکی پشتبەست بە داتاکانی چاودێریکردنی کەشتییەکان بڵاویکردەوە، هاوکات لەگەڵ دەستپێکردنی گفتوگۆکانی ئەمریکا و ئێران چەند کەشتییەک بەرەو گەرووی هورمز بەڕێکەوتوون. تۆڕەکە روونیشی کردەوە، تاوەکوو ئێستا هاتوچۆی دەریاوانی لە گەرووەکە بەراورد بە دۆخی ئاسایی زۆر کەمە.

عەباس عێراقچی، وەزیری دەرەوەی ئێران، ئەمڕۆ شەممە، 11ـی نیسانی 2026، رایگەیاند، وڵاتەکەی لە ژێر سایەی "بێمتمانەییەکی تەواو" بەرامبەر لایەنەکانی دیکە، دەچێتە ناو دانوستانەکانی داهاتووی تایبەت بە دۆسیەی ئەتۆمی.

پارێزگاریی ئازەربایجانی رۆژهەڵاتی ئێران رایگەیاند، بەهۆی لەناوبردنی ئەو تەقەمەنییانەی لە هێرشە سەربازییەکانی ئەمریکا و ئیسرائیل بۆ سەر ناوچە سەربازییەکانی دەوروبەری تەورێز نەتەقیونەتەوە، ئەمڕۆ دەنگی تەقینەوە لەناو شاری تەورێز و دەوروبەری دەبیسترێت. بۆیە  "داوا لە هاووڵاتییانی خۆشەویست دەکەین نیگەران نەبن و گوێ بە دەنگۆکان نەدەن، چونکە ئەم دەنگانە تەنها پڕۆسەیەکی کۆنترۆڵکراوە بۆ لەناوبردنی پاشماوەی تەقەمەنییە نەتەقیوەکان لە ناوچە سەربازییەکاندا."

ئەمڕۆ شەممە، 11ـی نیسانی 2026، پێش کۆبوونەوەیان لەگەڵ شاندی دانوستانکاری ئەمریکی؛ کۆبوونەوەی شاندی باڵای ئێران، لە ئیسلام ئاباد، لەگەڵ شەهباز شەریف، سەرۆکوەزیرانی پاکستان دەستپێکرد.

ئاژانسی "تەسنیم" رایگەیاندووە، پرسی پابەندنەبوونی واشنتن بە بەڵێنەکانی، تەوەرێکی سەرەکیی کۆبوونەوەکەی شاندی دانوستانکاری ئێران و سەرۆکوەزیرانی پاکستان دەبێت. 

بە گوێرەی هەمان سەرچاوە، راگرتنی شەڕ لە لوبنان و ئازادکردنی سەرمایە سڕکراوەکانی ئێران لە گرنگترین مەرجەکانی شاندی دانوستانکاری وڵاتەکەن بۆ دانیشتن لەگەڵ شاندی دانوستانکاری ئەمریکا. 

بە گوێرەی ئاژانسەکە، واشنتن بە فەرمی ئیسلام ئابادی ئاگادار کردووەتەوە بە مەرجەکانی دەستپێکردنی گفتوگۆ رازییە، بەڵام تاوەکوو ئێستا بەشێک لەو مەرجانە جێبەجێ نەکراون.

محەممەد جەعفەر ئەسەدی، جێگری بەرپرسی کاروباری پشکنینی بارەگای خاتەمولئەنبیا رایگەیاند، هێزی گەلی ئێران لە شەقامەکاندا ئەمریکای ناچار کرد بێتە سەر مێزی دانوستان.

ئەمڕۆ شەممە، 11ـی نیسانی 2026، تاهیر ئەندارابی، گوتەبێژی وەزارەتی دەرەوەی پاکستان، لە لێدوانێکی تایبەتدا، لەبارەی دانوستانی راستەوخۆی هەردوو شاندی باڵای ئەمریکا و ئێران لە ئیسلام ئاباد، بە کوردستان24ـی راگەیاند "ئەم گەڕەی دانوستانە جیاوازە و ناتوانین پێشبینی بکەین دەگەنە رێککەوتن یان نا، بەڵام گەشبینین کۆبوونەوەکە ئەنجامی ئەرێنی دەبێت". 

لە وەڵامی پرسیاری، "ئەگەر ئەمڕۆ دانوستانەکان ئەنجامی نەبوو، ئیسلام ئاباد میوانداریی هیچ گەڕێکی دیکەی گفتوگۆکان دەکات؟"  گوتەبێژی وەزارەتی دەرەوەی پاکستان گوتی "ئامادەین بۆ میوانداریکی هەر گەڕێکی دیکەی دانوستان، بەڵام جارێ نازانین هیچ گەڕێکی دیکە بەڕێوەدەچێت یان نا". 

ئەندارابی باسی لەوەش کرد، دوای تەواوبوونی دانوستانی راستەوخۆی ئەمڕۆ نێوان هەردوو شاندی باڵای ئەمریکا و ئێران؛ بەرپرسانی پاکستان راگەیەنراوێکی فەرمی بۆ رای گشتی و میدیاکان بڵاودەکەنەوە.