Dema çûna Serokwezîr bo Parlementoyê hat diyarkirin

Hewlêr (K24) – Dema çûna Serokwezîrê Herêma Kurdistanê Mesrûr Barzanî bo Parlementoyê hat diyarkirin û li gor vexwendina desteya Serokatiya Parlementoya Kurdistanê, roja duşemê 5ê Cotmeha 2020an di demjimêr 10:00ê de biçe parlementoyê.

Desteya Serokatiya Parlementoya Kurdistanê hemû endamên parlementoyê agahdar kiriye ku roja duşemê di demjimêr 10:00ê de, ji bo civîna parlementoyê amade bibin, ku berê li ser daxwaza Serokwezîrê Herêma Kurdistanê, li gor madeya 66 a peyrewa navxwe ya Parlementoya Kurdistanê daxwaza pêkanîna civînê kiribû.

Li gor zanyariyan, di civînê de Serokwezîrê Herêma Kurdistanê kurteyek li ser pêngavên cîbicîkirina yasaya çaksaziyê, rewşa darayî, danûstandin û gotûbêjên ligel Bexdayê, rewşa deverên Kurdistanî û pêngavêb rûbirûbûna vîrûsa koronayê derxe pêş.

Roja 26ê Îlona 2020an, Serokwezîrê Herêma Kurdistanê li gor madeya 66 a peyrewa navxwe ya Parlementoya Kurdistanê daxwaza pêkanîna civînê kiribû.