Li bajarên Wan, Mûş û Bedlîsê rêyên gelek gundan hatin girtin
Li sê bajarên Bakurê Kurdistanê, ji ber berfê rêya 81 gundan hat girtin.
Navenda Nûçeyan (K24) - Li parêzgehên Wan, Mûş û Bedlîsê yên Bakurê Kurdistanê, ji ber berfê rêya 81 gundan hat girtin.
Şaredariya Bajarê Mezin a Wanê ragihand ku ji ber berf û pûkê rêya 20 gundan hatiye girtin. Tîmên şaredariyê ji bo vekirina rêyan xebatên xwe berdewam dikin.
Li parêzgeha Wanê ji bilî rêya 20 gundan, rêya serekî ya navbera Wan û navçeya Miksê ji ber berfê hatiye girtin û tîmên peywendîdar ji bo vekirina rê dixebitin.
Li navenda Wanê jî tîmên berfê ji bo paqijkirina cade û kolanan dest bi kar û xebatên xwe kirine.
Rêveberê Îdareya Taybet a Bajêrê Mûşê Şeyhmus Yentur jî ragihand, ji ber berfê rêya 32 gundan hatiye girtin. Herwiha li navenda Mûşê jî tîmên şaredariyê dest bi paqijkirina cade û kolanan kirine.
Li Bedlîsê jî hefteyekê zêdetir e berf dibare û rêya 29 gundan hatiye girtin û xebatên vekirina rêyan berdewam in. Li navenda bajêr jî tîmên şaredariyê dest bi xebatên paqijkirina berfê kirin.