Berpirsekî Durzî: Plana qirkirina kêmîneyan heye, Kurd jî di metirsiyê de ne

Navenda Nûçeyan (K24) – Cîgirê Berpirsê Têkiliyên Derve yê Civaka Durzî Tewfîq El-Hicrî, hikûmeta Sûriyeyê û komên tundrew bi meşandina kampanyayeke "qirkirinê" ya li dijî civaka Durzî tawanbar kir. Wî bi awayekî eşkere hişyarî da ku heman metirsî dikare berê xwe bide herêmên Kurdan jî.

Daxwaza vekişînê û redkirina lihevkirinê

Di hevpeyvîneke taybet de bi Kurdistan24 re, El-Hicrî ku di heman demê de biraziyê Şêx Hîkmet el-Hicrî ye ku yek ji sê serokên ruhanî yên civaka Durzî ye, her cure lihevkirin bi Şamê re red kir û daxwaza vekişîna tam a artêşa Sûriyeyê û hemû komên çekdar ji parêzgeha Siwêdayê kir. 

Li gorî El-Hicrî, tiştê ku jê re "agirbest" dihate gotin, tenê rûpoşek bû. "Ew di bin navê aştiyê de ketin hundir, lê tundiyeke bêserûber pêk anîn." Herwiha got: "Komên çekdaran her tişt, ji sivîl û şervanan bigire heta jiyana kûvî kuştin û zirar gihandin herêmê."

Hişyarî: Kurd armanca pêşerojê ne

El-Hicrî got ku ev êrîş ne pevçûneke siyasî lê "qirkirineke etnîkî" ye ku ji aliyê hêmanên "Selefî-Cîhadî" ve tê birêvebirin. Wî bi taybetî hişyarî da û got: "Armanca wan tinekirina hemû kêmîneyan e, destpêkê Elewiyan û Durziyan û paşê jî Kurdan. Kurd bi awayekî eşkere tên armanckirin."

Banga Destêwerdana Navdewletî

Di dawiyê de, El-Hicrî bang li civaka navdewletî kir destwerdanê bike, da ku vekişîna hêzan misoger bibe û dawî li plana tinekirina civaka Durzî bê anîn. 

Cîgirê Berpirsê Têkiliyên Derve yê Civaka Durzî spasiya piştgiriya civaka Durzî ya cîhanê û navbeynkariya destpêkê ya Amerîkayê kir.