4emîn Festîvala Edebî ya Kurdistanê li Dihokê hat lidarxistin

Navenda Nûçeyan (K24) – Çaremîn Festîvala Edebî ya Kurdistanê bi amadebûna 35 helbestvanên ji her çar parçeyên Kurdistanê li bajarê Dihokê birêve çû.

Festîval bi serpereştiya Parêzgariya Dihokê, Rêveberiya Giştî ya Rewşenbîrî û Hunerî û Yekîtiya Nivîskaran - Tayê Dihokê roja 3ê Cotmehê dest pê kir. Di çalakiya îsal de, 35 helbestvan ji her çar parçeyên Kurdistanê bi berhemên xwe yên edebî beşdar bûn. Piştî nirxandina deqan ji aliyê lêjneya pispor ve, hejmarek ji helbestan derbasî qonaxa dawî bûn.

Ev festîval ji aliyê wêjeyî ve xwedî girîngiyeke berbiçav e û zemînekê diafirîne bo hevdîtin û pevguhertina hizir û ramanên nû di navbera helbestvanên kurd de.

Rêkxerê festîvalê Elend Mzûrî derbarê armanc û naveroka bernameyê de ji Kurdistan24ê re ragihand, ev çalakiyeke salane ye; di salên borî de li Hewlêr û Silêmaniyê hatibû lidarxistin û îsal jî Dihok mêvandariya wê dike.

Mzûrî her wiha da zanîn ku festîval bi taybetî ji bo helbestê hatiye terxankirin û got: "Di dawiya festîvalê de, dê di her sê warên sereke yên helbestê de—helbesta klasîka arûzî, klasîk û helbesta azad—sê berhemên herî serkeftî bên xelatkirin."