ئەمەریکا هۆشداری لە گەڕانەوەی داعش دەدات
"داعش لە سووریا و عێراق هەوڵی خۆڕێکخستنەوە دەدات"
K24 - ھەولێر
فەرماندەی فەرماندەیی ناوەندی سوپای ئەمەریکا هۆشداری لە گەڕانەوەی داعش دەدات و سەبارەت بە سیاسەتی ئیدارەی بایدن لەبەرامبەر ئێران رایگەیاند "هەنگاوەکانمان بەرامبەر ئێران بە هەماهەنگی دەبن لەگەڵ هاوپەیمانەکانمان".
ژەنراڵ کێنیت مەکێنزی، فەرماندەی فەرماندەیی ناوەندی ئەمەریکا لە پانێڵێکی تایبەتی پەیمانگەی رۆژهەڵاتی ناوەڕاستدا گوتی: "داعش بەردەوامە لە جموجوڵ و هێرشەکانی لە سووریا و عێراق، هەوڵی خۆڕێکخستنەوە و خۆ نوێکردنەوە دەدات".
مەکێنزی، جەختدەکاتەوە، وڵاتەکەی بەردەوام دەبێت لە هاوکاری و پشتیوانیەکانی بۆ هاوبەشەکانیان بۆئەوەی گوشارەکانی سەر داعش کەم نەکرێنەوە. هۆشداری سەرهەڵدانی نەوەیەکی دیکە داعش دەدات، کە ئێستا بە هەزاران لە ژن و منداڵ و چەکدارە دەستگیرکراوەکانیان لە کەمپەکانی رۆژئاوای كوردستان، وڵاتانیش ئامادەنین وەریانبگرنەوە.
فەرماندەی فەرماندەیی ناوەندی سوپای ئەمەریکا لەبارەی ئێرانەوە ئاماژەی بەوەدا: "تاران هۆکاری ناسەقامگیری عێراق و سووریا و یەمەنە. هەنگاوەکانمان بەرامبەر ئێران بە هەماهەنگی لەگەڵ هاوپەیمانەکانمان دەبن لە ناوچەکە".