ئێران و یەكێتى ئەوروپا كۆبوونەوە
ئێران و یەكێتى ئەوروپا جارێكى دیكە بۆ تاوتوێكردنى بەرنامەى ناووكى كۆمارى ئیسلامى ئێران كۆبوونەوە و چاوەڕوان دەكرێت لە كۆتایى ئەم مانگەدا رێككەوتنیى كۆتایى نێوان ئێران و خۆرئاوا واژوو بكرێت.
K24 – ھەولێر
ئێران و یەكێتى ئەوروپا جارێكى دیكە بۆ تاوتوێكردنى بەرنامەى ناووكى كۆمارى ئیسلامى ئێران كۆبوونەوە و چاوەڕوان دەكرێت لە كۆتایى ئەم مانگەدا رێككەوتنیى كۆتایى نێوان ئێران و خۆرئاوا واژوو بكرێت.
محەممەد جەواد زەریف، وەزیرى دەرەوەى كۆمارى ئیسلامى ئێران و هەریەك لە هاوتا بریتانى، ئەڵمانیى، فەرەنسایى و هاوتاكەى لە یەكێتى ئەوروپا رۆژى دووشەممە لە لۆكسۆمبۆرگ كۆبوونەوە.
سەرچاوەیەكى بەرپرس لە یەكێتى ئەوروپا بۆ فرانس 24 رایگەیاندووە، كۆبوونەوەكە وەك ئامادەكارییەك بووە بۆ گەڕى كۆتایى دانووستانەكانى نێوان ئێران و خۆرئاوا.
هاوكات ئەو كۆبوونەوەیە لە پەراوێزى كۆبوونەوەى مانگانەى وەزیرانى دەرەوەى یەكێتى ئەوروپا لە لۆكسمبۆرگ ئەنجامدراوە.
ماوەى 20 مانگە دانووستاندنى نێوان ئێران و گرووپى (5+1) بەردەوامە بە مەبەستى گەیشتن بە رێككەوتنێكى كۆتایى سەبارەت بە پرسى ناووكى ئەو وڵاتە و بڕیارە لە كۆتایى ئەم مانگەدا واژوو لەسەر ئەو رێككەوتنە بكرێت.