ئەمریكا ڤیدیۆی ھاوێشتنی مووشەك لە لایەن ئێرانەوە بڵاودەكاتەوە

K24:

سوپای ئەمریكا چەند گرتەیەکی ڤیدیۆیی بڵاوكردووەتەوە، كە دەریدەخەن سوپای پاسدارانی كۆماری ئیسلامیی ئێران مووشەك ئاراستەی چەند كەشتییەكی جەنگاوەر دەكات.

ئاژنسی ئەسۆشەیتید پرێس ئەم ھەواڵەی پشتڕاستكردووەتەوە و دەڵێ: "ئەو ڤیدیۆیانە 45 چرکەن و رەش و سپین و لە 26/12/2015  تۆماركراون".

سوپای ئەمریكا دەشڵێ: "لە ڤیدیۆکاندا چەند بەلەمی سوپای پاسداران دەردەكەون كە لە گەرووی ھۆرمۆزەوە مووشەك ئاراستەی كەشتییە سەربازیی و بازرگانییەكانی نزیك خۆیان دەكەن".

بە گوتەی سوپای ئەمریكا: ھێلیكۆپتەری (سی ھاوكی) ئەمریكا ئەو گرتە ڤیدێوییانەیان تۆماركردووە و لەسەر نبنەمای یاسای ئازادیی زانیاری ئەم ڤیدیۆیانەمان بڵاوکردەوە.

تا ئێستا بەرپرسانی ئێرانی ھیچ راگەیەندراوێکیان لەبارەی ئەم ھەواڵە بڵاونەکردووەتەوە، تەنیا رەمەزان شەریف، بەرپرسی پەیوەندییەكانی سوپای پاسداران، گوتی: "ھێزی دەریایی ئێران لەو كاتەدا مانۆڕی سەربازیی نەبووە و ئەمریكا شەڕی دەروونی دەكات".