به‌ وێنه‌ ... كه‌مپێكی نوێ بۆ په‌ناخوازانی كورد له‌ فه‌ره‌نسا دروست ده‌كرێ

K24- له‌نده‌ن

رێكخراوی پزیشكانی بێسنوور كه‌مپێكی نوێ بۆ په‌ناخوازانی شاری كالێی فه‌ره‌نسا دروست ده‌كات كه‌ زۆرینه‌یان كوردن .

رۆژنامه‌ی ده‌یلی مه‌یلی به‌ریتانی رایگه‌یاند، كه‌مپه‌ نوێیه‌كه‌ به‌ دار دروستكراوه‌ و 3 ملیۆن پاوه‌ندی تێچووه، كه‌مپه‌كه‌ نزیكه‌ی  دووسه‌د په‌ناخواز له‌ خۆی ده‌گرێت كه‌ زۆرینه‌یان كوردی باشوور و رۆژئاوای كوردستانن و چاوه‌ڕێی ئه‌وه‌ن بچنه‌ به‌ریتانیا.

هه‌یسه‌م كه‌ په‌ناخوازێكی كورده‌ و خه‌ڵكی شاری كه‌ركووكه‌، له‌گه‌ڵ په‌رێزی خێزانی و دوو منداڵی به‌ناوی به‌هێز و محه‌مه‌د له‌و كه‌مپه‌ ده‌ژین، ده‌ڵێ "به‌ به‌راورد له‌گه‌ڵ شوێنی پێشوومان ئه‌و شوێنه‌ زۆر باشه‌ ، هه‌رچه‌نده‌ ساردیشه‌ به‌ڵام ئه‌مه‌ شوێنێكی كاتییه‌ و ده‌مانه‌وێ به‌ زووترین كات بچینه‌ به‌ریتانیا".

توانا په‌ناخوازێكی دیكه‌ی كورده‌ و ده‌ڵێ" بارودۆخمان لێره‌ خراپ نییه‌ ، هه‌رچه‌نده‌ زۆر سه‌رماشه‌ و هیته‌رمان نییه‌، بۆیه‌ ناچارین به‌ به‌تانی خۆمان گه‌رم بكه‌ینه‌وه‌ یان چاوه‌ڕێی هه‌ڵهاتنی خۆربین".