نیوزیلاندا 100 راوێژكاری دیكەی سەربازی رەوانەی عێراق دەكات

K24 - ھەولێر:

بە مەبەستی مەشق و راھێنان بە سەربازانی عێراقی لە بنکەی سەربازی تاجی لە باکووری شاری بەغدا، بڕیارە سوپای نیوزیلاندا 100راوێژکاری دیکەی سەربازی رەوانەی عێراق بكات.

لە راگەیاندراوێکدا سوپای نیوزیلاندا ئاشکرای کرد: "بڕیارە لە چەند ھەفتەی داھاتوودا 100 راوێژکاری دیکەی سەربازی رەوانەی عێراق بکرێن، بە مەبەستی ئامادەکردنی سەربازانی عێراق بۆ بەشداریکردن لە ئۆپراسیۆنی رزگارکردنەوەی شاری مووسڵ".

سوپای نیوزیلاندا ئەوەشی ئاشکرا کردووە: "مەشق و راھێنانەکان بریتی دەبن لە فێرکردنی سەربازانی عێراق بۆ چۆنیەتی شەڕکردنی کۆڵان بە کۆڵان و مین پوچەڵکردنەوە و ئەنجامدانی فریاگوزاریی سەرەتایی بۆ بریندارەکان لەکاتی شەڕدا".

لە راگەیاندراوەكەدا سوپای نیوزیلاند ئەوەشی خستوەتەڕوو: "لە ماوەی رابردوودا تا ئێستا نزیكەی 4 ھەزار سەربازی عێراق لە سەردەستی راوێژکارانی ئەوان مەشق و راھێنانیان پێكراوە".

نیوزلاندا یەكێكە لەو وڵاتانەی لە شەڕی دژی داعش ھاوكاری سەربازی پێشكەش بە عێڕاق كردووە، لە ماوەی رابردوودا، چەندین راوێژكاری بۆ مەشق و راھێانی سەربازی ناردوەتە عێراق.