هەواڵێکی ناخۆش بۆ ئەوانەی هەستیارییان هەیە
K24- هەولێر:
توێژینەوەیەکی نوێ، کاریگەری گۆڕانی کەشوهەوا لەسەر ئەو کەسانەی کێشەی هەستیارییان هەیە دەردەخات.
بەگوێرەی توێژینەوەکە، بەهۆی گەرمبوونی زەوی لە ماوەی 30 ساڵی رابردوو، دەنکە هەڵاڵەی گوڵ و پاشماوەی گژوگیاکان لە هەوادا زۆر زیادی کردووە، ئەمەش وایکردووە، ئەو کەسانەی هەستیارییان لە بەهاردا هەیە، زیاتر دووچاری هەستیاریی ببن.
هەستیارییەکە لە بەهار دەستپێدەکات و هەندێکجار تاوەکو پایز کاریگەری لەسەر کەسە دەبێت. نیشانەکانی بریتین لە، تەڕبوونی لووت، پژمین، تەڕبوونی چاو و خورانی لووت.
توێژینەوەکە لە لایەن چەند پزیشکێکەوە ئەنجامدراوە و لە گۆڤاری ناشناڵ ئەکادیمی ساینس بڵاوکراوەتەوە.
ئەنجامی توێژینەوەکە ئەوەبووە، لە ساڵی 1990 تاوەکو 2019، نیشانەکانی هەستیاریی 20 رۆژ زووتر دەردەکەون و 10 رۆژ درەنگتر کۆتایی دێت. هەروەها رێژەی دەنگە هەڵاڵە لە هەوادا 21% زیادی کردووە.
ئەوەش ئاشکرا کراوە، لە چەند ساڵی داهاتوو، رێژەی هەستیاریی بەهۆی هەمان مەبەست زیاتر دەبێت و کاریگەری زیاتر لەسەر خەڵک دادەنێت ئەمەش بەهۆی پێشبینیکردنی گەرمبوونی زیاتری زەوی و گۆڕانی کەش و هەوا.
هەستیاریی لە بەهار یاخود دەردە بەهارە، هیچ چارەسەرێکی بنەڕەتی نییە، بەڵکو تەنها هەندێک رێگا هەن دەتوانن کاریگەرییەکانی کەمتر بکەنەوە.
Gizmodo