كازمی لەگەڵ رێكخەری كۆشكی سپی باسی كشانەوەی "ھێزە شەڕكەرەكانی ئهمهریكای" كرد
جەختكرایەوە لەسەر كاراكردنی دەركەوتەكانی دانوستانی ستراتیجی لە نێوان ھەردوو وڵاتدا
K24 – ھەولێر:
سەرۆك وەزیرانی عێراق، مستەفا كازمی، ئەمڕۆ سێشەممە لەگەڵ شاندێكی ئەمەریكا باسی كشانەوەی "ھێزە شەڕكەرەكانی ئەمەریكا"ی لە عێراق كرد و داوای لە شاندەكە كرد ئەمەریكا ھاریكاری عێراق بكات لە بەگەڕخستنی ھەندێك دەزگای تەندرووستی.
بەپێی راگەیاندراوێكی حكومەتی عێراق، كازمی پێشوازیكردووە لە رێكخەری كۆشكی سپی بۆ كاروباری رۆژھەڵاتی ناوەڕاست و باكووری ئەفریقا، برێت مەكگۆڕك و راوێژكاری وەزارەتی دەرەوەی ئەمەریكا، دێریك شۆلێت و یاردەدەری وەزیری دەرەوە بۆ كاروباری رۆژھەڵاتی ناوەڕاست، جۆی ھێد و جێگری یاردەدەری وەزیری بەرگری ئەمەریكا بۆ كاروباری رۆژھەڵاتی ناوەڕاست، دانا سترۆل.
لە دیدارەكەدا باس لە ھەماھەنگی و ھاریكاری ھاوبەش كرا لە بوارە جیاجیاكاندا و جەختكرایەوە لەسەر كاراكردنی دەركەوتەكانی دانوستانی ستراتیجی لە نێوان ھەردوو وڵاتدا، بە تایبەتی ئەوەی پەیوەستە بە كشانەوەی ھێزە شەڕكەرەكانی ئەمەریكا لە عێراق و پێشخستنی ھاریكاری و بەرفراوانكردنی لە بوارەكانی ئابووری و رۆشنبیری و بازرگانی.
ھەروەھا لەو دیدارە عێراقییە ئەمەریكاییە باس لە بوارەكانی تەندرووستی و لەناوبردنی پەتای كۆرۆنا و ھاریكاریكردن بۆ دابینكردنی پشتیوانی بۆ بەگەڕخستنی ھەندێك لە دەزگا تەندرووستییەكان لە عێراق.
ئەم شاندەی ئەمەریكا، ھەر ئەمڕۆ پێشتر لەگەڵ ھەر یەك لە بەرھەم ساڵح سەرۆكی عێراق و محەمەد حەلبووسی، سەرۆكی پەرلەمانی عێراق بەجیا كۆبوونەوە.