مووشەکە چینیەکە كه‌وته‌خواره‌وه‌

K24 - هه‌ولێر:

دەسەڵاتدارانی چین رایانگه‌یاند، بەیانی ئەمڕۆ یه‌كشه‌ممه‌ (9ی ئایار/ مایۆی 2021) مووشەکی "لۆنگ مارش 5بی"، دوای هاتنە ناوەوەی بۆ ناو بەرگە هەوای گۆی زەوی، لە زه‌ریای هیندی، لە نێوان باشووری هه‌ردوو وڵاتی هیندستان و سریلانکا کەوتووەتە خوارەوە.

نووسینگه‌ی ئه‌ندازیاریی بۆشایی ئاسمانی چینی ئاماژه‌ی به‌وه‌ كرد، بەشی زۆری مووشەکەکە لەکاتی هاتنە ناوەوەی بۆ ناو بەرگە هەوای گۆی زەوی تێكشاوە، كاتژمێر (5:24) به‌ره‌به‌یانی ئه‌مڕۆ له‌ زه‌ریای هیندی، له‌نێوان هه‌ردوو وڵاتی هیندستان و سریلانكا كه‌وتووه‌ته‌ خواره‌وه‌.

چین مووشەکی "لۆنگ مارش 5بی"، له‌ (29)ی مانگی رابردوو هەڵدایە بۆشایی ئاسمان، دواتر رایگەیاند پەیوەندیان لەگەڵ مووشەکەکە نەماوە و لە کۆنتڕۆڵ دەرچووە، به‌هۆی دیارنه‌بوونی شوێنی كه‌وتنی له‌سه‌ر زه‌وی، چه‌ند رۆژێكه‌ دڵه‌ڕاوكێی له‌جیهان درووست كردووه‌.

د.ی