نێچيرڤان بارزانى و جۆوى هوود ئاسته‌نگه‌كانى به‌رده‌م پرۆسه‌ى سياسى عێراقیان تاووتوێ كرد
جه‌ختيان له گرنگيى ته‌بايى و يه‌كڕيزيى لايه‌نه كوردستانييه‌كان كرده‌وه
K24 - هەولێر:
ئێواره‌ى ئه‌مڕۆ چوارشه‌ممه 2022/4/13 نێچيرڤان بارزانى، سه‌رۆكى هه‌رێمى كوردستان پێشوازى له شاندێكى ئه‌مه‌ريكى به سه‌رۆكايه‌تيى جۆوى هوود، جێگرى ياريده‌ده‌رى وه‌زيرى ده‌ره‌وه‌ى ئه‌مه‌ريكا كرد.
له ديدارێكدا دوايين پێشهاته‌كانى دۆخى سياسيى عێراق، په‌يوه‌ندييه‌كانى عێراق و هه‌رێمى كوردستان له‌گه‌ڵ ئه‌مه‌ريكا، په‌يوه‌ندييه‌كانى هه‌ولێر ـ به‌غدا و هه‌وڵه‌كان بۆ چاره‌سه‌ركردنى كێشه‌كانيان، مه‌ترسييه‌كانى داعش، دۆخى ناوچه‌ى شه‌نگال و بارى ئابوورى له عێراق و هه‌رێمى كوردستان، تاوتوێ كران.
هه‌ردوولا هاوڕا بوون له‌سه‌ر گرنگيى تێپه‌ڕاندنى كێشه و ئاسته‌نگه‌كانى به‌رده‌م پرۆسه‌ى سياسى له عێراق و ده‌رچوونى له دۆخى چه‌قبه‌ستوويى و پێكهێنانى حكوومه‌تێك كه وه‌ڵامده‌ره‌وه‌ى داواكارى و خواسته‌كانى هاووڵاتيان و ته‌واوى پێكهاته‌كانى وڵات بێت، هه‌روه‌ها جه‌ختيان له گرنگيى ته‌بايى و يه‌كڕيزيى لايه‌نه كوردستانييه‌كان كرده‌وه.
جۆوى هوود، سوپاسى نێچيرڤان بارزانى كرد بۆ په‌يوه‌ندى و ئه‌و هاريكارييه‌ى له ماوه‌ى ڕابردوودا له‌گه‌ڵيان و دامه‌زراوه‌كانى هه‌رێمى كوردستاندا هه‌يبووه و جه‌ختى له په‌يوه‌نديى به‌هێز و به‌رده‌واميى دۆستايه‌تى و هاوبه‌شى و پشتيوانيى ئه‌مه‌ريكا بۆ عيراق و هه‌رێمى كوردستان كرده‌وه.
له ته‌وه‌رێكى دیكه‌ی ديداره‌كه‌دا كه ژماره‌يه‌ك ديپلۆماتكار و به‌رپرسان له كونسولخانه‌ى ئه‌مه‌ريكا له هه‌رێمى كوردستان ئاماده‌ى بوون، پرسه‌كانى ئازادى ڕاده‌برين، مافه‌كانى مرۆڤ و سه‌روه‌ريى ياسا، پێشهاته‌كان له ئۆكراینا و دۆخى ئه‌فغانستان و ناوچه‌كه به‌گشتى خرايه به‌ر باس.
له دوا ته‌وه‌رى ديداره‌كه‌دا نێچيرڤان بارزانى هيواى سه‌ركه‌وتنى بۆ جۆوى هوود خواست كه بڕياره له داهاتوويه‌كى نزيك و له پۆستێكى تازه‌ى ديپلۆماسيدا، ده‌ستبه‌كار بێت.
