تیجه‌ن كاراش باس له‌ خوێندنه‌وه‌ی راگه‌یه‌ندراوی "كوده‌تاچییه‌كان" ده‌كات

K24 - هه‌ولێر:

تیجه‌ن كاراش، خانمه‌ بێژه‌ی كه‌ناڵی فه‌رمی حكوومه‌تی توركیا (TRT HEBER)، باس له‌ ساته‌وه‌ختی هه‌ڵكوتانه‌ سه‌ر كه‌ناڵه‌كه‌ ده‌كات، له‌لایه‌ن ژماره‌یه‌ك سه‌ربازی سه‌ر به‌ "كوده‌تاچییه‌كان" و ده‌ڵێت: "ژماره‌یه‌ك سه‌رباز هه‌ڵیانكوتایه‌ سه‌ر كه‌ناڵه‌كه‌ و به‌ چه‌ك هه‌ڕه‌شه‌یان لێكردم راگه‌یه‌ندراوه‌كه‌یان بخوێنمه‌وه‌".

كاراش دوای شكستهێنانی كوده‌تا سه‌ربازییه‌كه‌ و ده‌ستگیركردنی ئه‌و سه‌ربازانه‌ی ده‌ستییان به‌سه‌ر كه‌ناڵه‌كه‌دا گرتبوو، سوپاسی هاووڵاتییان و هێزی پۆلیسیان كرد كه‌ توانیویانه‌ ئازادی بكه‌ن.

ئه‌و خانمه‌ بێژه‌ره‌، له‌ سه‌رجه‌م كه‌ناڵه‌ فه‌رمییه‌كانی حكوومه‌ت، به‌ رووخسارێكی په‌شۆكاوه‌وه‌ ده‌ركه‌وت، كه‌ راگه‌یه‌ندراوی سوپا ده‌خوێنێته‌وه‌ و تێیدا باسی له‌ راگرتنی ده‌ستوور ده‌كرد و سه‌رۆكی وڵاتیشی به‌ خائین وه‌سف ده‌كرد.

دواتر بێژه‌ره‌كه‌ له‌ ناو ئاپۆره‌ی هاووڵاتییان ده‌ركه‌وت و خه‌ڵك وێنه‌ی سلێفیان له‌گه‌ڵ ده‌كرد.

كاراش ده‌ڵێت: "چوار له‌ سه‌ربازه‌كان بۆ ماوه‌ی نیو كاتژمێر له‌ناو كه‌ناڵه‌كه‌ منیان ده‌ستبه‌ركرد و داوایان لێكردم راگه‌یه‌ندراوه‌كه‌ بخوێنمه‌وه‌، ئه‌وان ده‌یانگوت ئه‌وه‌ له‌ پێناو به‌رژه‌وه‌ندی وڵاته‌كه‌ماندایه‌".

هه‌روه‌ها گوتی: "ئێستا كۆتایی به‌و مۆته‌كه‌یه‌ هات، ئه‌وان به‌ چه‌ك هه‌ڕه‌شه‌یان له‌ ئێمه‌ ده‌كرد، هه‌موو ئه‌وانه‌ی ئێمه‌ ده‌بینێت، ده‌زانێت چه‌نده‌ پابه‌ندی شه‌رعییه‌ت و دیموكراتییه‌تین، سوپاسی هه‌موو ئه‌وانه‌ ده‌كه‌م بۆ هاوكاریكردنمان هاتوونه‌ته‌ ئێره‌".

ئه‌و باس له‌ ساته‌وه‌ختی ئازادكردنی كه‌ناڵه‌كه‌ ده‌كات و ده‌ڵێت: "هاووڵاتییان هه‌ڵیانكوتایه‌ سه‌ر كه‌ناڵه‌كه‌ و په‌لاماری سه‌ربازانییاندا، به‌هۆی ئه‌وه‌ی ژماره‌ی هاووڵاتییان یه‌كجار زۆربوو، سه‌ربازان نه‌یانتوانی رێگرییان لێبكه‌ن و ناچاربوون پاشه‌كشه‌ بكه‌ن".

كاراش دواتر له‌نێو هاوكارانی راوه‌ستا و داوای لێبوردنی له‌ خوێندنه‌وه‌ی راگه‌یه‌ندراوه‌كه‌ كرد و گوتی: "ئه‌و كاره‌م به‌ ویستی خۆم نه‌كردووه‌ و زۆریم لێكراوه‌، سوپاسی جه‌ماوه‌ر و هاووڵاتییانیش ده‌كه‌م، كه‌ له‌ ره‌وش و هه‌ڵوێسته‌كه‌ تێگه‌یشتوون".

دواتر چالاكوانان و هاووڵاتییان وێنه‌ی ئه‌و سه‌ربازه‌یان له‌ تۆڕه‌ كۆمه‌ڵایه‌تییه‌كان بڵاوكرده‌وه‌، كه‌ بێژه‌كه‌ی ناچار به‌ خوێندنه‌وه‌ی راگه‌یه‌ندراوی "ئه‌نجوومه‌نی ئاشتی" كردبوو.

شه‌وی 15 له‌سه‌ر 16ی ته‌ممووز/ یۆلیۆی 2016، گرووپێكی چه‌كداری له‌ناو سوپای توركیا، هه‌وڵیاندا كوده‌تای سه‌ربازی به‌سه‌ر حكوومه‌تی توركیا بكه‌ن، به‌ڵام دواتر هه‌وڵه‌كه‌ كۆتایی پێهێنرا.