په‌یامنێری كوردستان24: له رێگه‌ی درۆنه‌وه هێرشكراوه‌ته سه‌ر فڕۆكه‌خانه‌ی عه‌ربه‌ت
K24 - سلێمانی:
هاوژین جه‌مال په‌یامنێری كوردستان24 ده‌ڵێت: پاش نیوه‌ڕۆی ئه‌مڕۆ بۆردومانی فڕۆكه‌خانه‌ی كشتوكاڵی عه‌ربه‌ت كراوه.
هه‌روه‌ها ده‌ڵێت: "قه‌ره‌باڵغییه‌كی زۆر له نزیك فڕۆكه‌خانه‌كه هه‌یه و هێزێكی زۆری ئه‌منی و تیمه ته‌ندروستییه‌كان له‌وێ كۆبوونه‌وه‌ته‌وه".
باسی له‌وه‌شكرد، "له رێگه‌ی دوو درۆنه‌وه هێرشكراوه‌ته‌سه‌ر فڕۆكه‌خانه‌ی عه‌ربه‌ت".
روونیكرده‌وه، فڕۆكه‌خانه‌كه كشتوكاڵی بووه، به‌ڵام پێش چه‌ند مانگێك هێزه‌كانی هاوپه‌یمانان نۆژه‌نیان كردووه‌ته‌وه، بووه‌ته جێگه‌ی مه‌شق و راهێنانی هێزێكی یه‌كێتی، ئه‌مڕۆ دوای كاتژمێر 4:00 به درۆن هێرشكراوه‌ته‌سه‌ر ئه‌و فڕۆكه‌خانه‌یه.
به گوێره‌ی زانیارییه‌كانی هاوژین جه‌مال په‌یامنێری كوردستان24، حه‌وت كه‌س له ریزه‌كانی هێزێكی یه‌كێتی له‌نێو ئه‌و فڕۆكه‌خانه‌یه به‌هۆی هێرشه‌كه‌وه گیانیان له‌ده‌ستداوه و چوار ئه‌ندامی هیزه ئه‌منییه‌كانیش بریندارن.
ئه‌وه‌شی خسته‌ڕوو، هێزه ئه‌منییه‌كان رێگه به رۆژنامه‌نووسان ناده‌ن له نزیكه‌وه رووماڵی ئه‌و رووداوه بكرێت.
باسی له‌وه‌شكرد، هه‌ردوو نه‌خۆشخانه‌ی شار و شۆڕش ئاماده‌كراون.
له ماوه‌كانی رابردوودا چه‌ندینجار ئۆتۆمبێلی چه‌كدارانی په‌كه‌كه له ناوچه‌كانی شارباژێڕ و چه‌ند ناوچه‌یه‌كی دیكه‌ى سنوورى پارێزگای سلێمانی له‌لایه‌ن فڕۆكه بێفڕۆكه‌وانه‌كانی توركیاوه بۆردومانكراون، له‌كاتێكیشدا سبه‌ی دوایین واده‌ی كۆتاییهاتنی رێككه‌وتنی ئه‌منیی نێوان عێراق و ئێرانه، كۆماری ئیسلامی ئێران جه‌ختی كرده‌وه، به‌هیچ شێوه‌یه‌ك ئه‌و رێككه‌وتنه درێژ ناكه‌نه‌وه.