جەواد شەکرچی سەردانی دامەزراوەی کوردستان24 دەکات

K24 – هەولێر:

جەواد شەکرچی، هونەرمەندی ناوداری عێراقی سەردانی دامەزراوی کوردستان24 دەکات و لەلایەن ئەحمەد زاوێتەیی، بەڕێوەبەری گشتیی دامەزراوەکەوە پێشوازی لێکرا.

رۆژی هەینی (27ـی تشرینی یەکەمی 2023) جەواد شەکرچی، ئەکتەر و هونەرمەندی ناوداری عێراقی کە لەم ساڵانەی دواییدا وەک پێشکەشکاری بەرنامە لە میدیا عەرەبی و عێراقییەکان ناسراوە، سەردانی دامەزراوەی کوردستان24ـی کرد.

لەمیانی سەردانەکەیدا، جەواد شەکرچی سەرسامی خۆی بە کارەکانی دامەزراوەی کوردستان24 دەربڕی و ئامادەیی خۆی بۆ هەر جۆرە هاوکاری و هەماهەنگییەک نیشاندا.

جەواد شەکرچی لە ساڵی 1951 لە بەغدا لەدایکبووە و دەرچووی پەیمانگەی هونەرەجوانەکانی بەغدایە لە ساڵی 1978 و خاوەنی دەیان کاری هونەری بەناوبانگە لە ناوخۆ و دەرەوەی عێراق.

شەکرچی لە شانۆ، دراما و سینەمادا، چەندین کاری هونەری ئەنجامداوە کە دەنگدانەوەی زۆری لەسەر ئاستی هونەریی عێراق و وڵاتانی عەرەبیدا هەیە و ئێستاش لە یەکێک لە کەناڵە دیارە عەرەبییەکاندا، پێشکەشکاری بەرنامەیەکی کێبڕکێی خێزانییە کە لە سۆشیال میدیادا دەنگدانەوەی زۆری هەیە.