رێبەر ئەحمەد و حوسێن ئەمیر عەبدوڵڵاهیان لە جنێڤ کۆبوونەوە
K24 – هەولێر:
وەزیری ناوخۆی حکومەتی هەرێمی کوردستان و وەزیری دەرەوەی کۆماری ئیسلامی ئێران لە جنێڤ کۆبوونەوە و گفتوگۆیان لەبارەی جێبەجێکردنی رێککەوتننامەی ئەمنی نێوان تاران و بەغدا کرد.
رۆژی پێنجشەممە (14ـی کانوونی یەکەمی 2023) رێبەر ئەحمەد، وەزیری ناوخۆی حکومەتی هەرێمی کوردستان لە پەراوێزی کۆڕبەندی جیهانی پەنابەران لە جنێڤ، لەگەڵ حوسێن ئەمیر عەبدوڵڵاهیان، وەزیری دەرەوەی کۆماری ئیسلامی ئێران کۆبووەوە.
لە پەیامێکدا لە تۆڕی کۆمەڵایەتی ئێکس (تویتەری پێشوو)، وەزیری ناوخۆی حکومەتی هەرێمی کوردستان رایگەیاندووە، لەگەڵ وەزیری دەرەوەی کۆماری ئیسلامی ئێران باسیان لە پەیوەندی مێژوویی نێوان عێراق و ئێران کردووە و تاوتوێی زیاتر هەماهەنگی و جێبەجێکردنی رێککەوتننامەی ئەمنی نێوان هەردوو وڵات کردووە.
Pleased to have met with the Minister of Foreign Affairs of the Islamic Republic of Iran @Amirabdolahian in #Geneva, Switzerland. Talks focused on the rich historical ties between #Iraq and #Iran, exploring avenues for further cooperation and the successful implementation of the… pic.twitter.com/DhuSFl5pUg
— Rêber Ahmed (@RayberAhmed) December 14, 2023
کۆڕبەندی جیهانی پەنابەران 2023، رۆژی چوارشەممە (13ـی کانوونی یەکەمی 2023) لە شاری جنێڤی سویسرا دەستیپێکرد و تا رۆژی هەینی بەردەوام دەبێت، شاندێکی عێراق بە سەرۆکایەتیی رێبەر ئەحمەد، وەزیری ناوخۆی حکومەتی هەرێمی کوردستان، به یاوهری ئالان حهمهسهعید، وهزیری پهروهردەی حکومەتی هەرێمی کوردستان بەشداری کۆڕبەندەکەن.
لە رۆژی یەکەمی کۆڕبەندەکەدا، رێبەر ئەحمەد وەزیری ناوخۆی حکومەتی هەرێمی کوردستان وتارێكی پێشکەشکرد و باسی لە دۆخی پەنابەران لە عێراق و هەرێمی کوردستان کرد و ئاماژەی بەوەدا، لە عێراق شانازی بەو دەستکەوتانە دەکەن کە هەرێمی کوردستان بەدەستی هێناوە، هاوکات سەرکەوتووبووینە لە لەخۆگرتنی پەنابەر و ئاوارەکان، جەختیکردەوە، دەستووری فیدراڵی و هەرێمی کوردستان هەماهەنگن لەگەڵ کۆمەڵگەی نێودەوڵەتی و رێکخراوەکانی دیکە لە دەستبەرکردنی مافی پەنابەران لە دابینکردنی ئاسایش و پشتیوانی بۆ مانەوەیان لە عێراقدا.