پارتی داوای دانیشتنێکی بەپەلەی پەرلەمانی عێراق لەبارەی هێرشەکەی سەر هەولێر دەکات
K24 - هەولێر
فراکسیۆنی پارتی لە پەرلەمانی عێراق، داوای دانیشتنێکی بەپەلەی پەرلەمان بۆ تاوتوێکردنی هێرشە مووشەکییەکەی سەر هەولێر دەکات و دەڵێت، "بۆ هەموو لایەک روونبووەوە، ئامانجی ئێران تێکدانی سەقامگیری عێراق و کوردستانە".
ئەمڕۆ سێشەممە، 16-01-2024، فراکسیۆنی پارتی دیموکراتی کوردستان لە پەرلەمانی عێراق لە راگەیەندراوێکدا "بە توندی" سەرکۆنەی هێرشە مووشەکییەکەی شەوی رابردووی سوپای پاسدرانی ئێران بۆسەر هەولێر کرد و، داواش دەکات پەرلەمانی عێراق دانیشتنێکی بەپەلە بۆ تاوتوێکردنی هێرشەکە ببەستێت.
بەهۆی ئەو هێرشە مووشەکە بالیستییەی کرایە سەر شوێنێکی سڤیلنشینی هەولێر، ژمارەیەک هاووڵاتیی سڤیل شەهیدبوون و بەشێکی دیکەشیان برینداربوون کە برینیان سەختە.
فراکسیۆنی پارتی لە پەرلەمانی عێراق داوا لە حکومەتی فیدراڵی دەکات؛ رۆڵی خۆی بگێڕێت لە سەرکۆنەکردن و پاراستنی ئاسایش و سەقامگیری عێراق و، گرتنەبەری رێگەچارەی یاسایی و دیپلۆماسی بۆ وەڵامدانەوەی "ئەم دوژمنکارییە". هاوکات داواش دەکات رێکاری پێویست بگرێتەبەر بۆ پاراستنی ئاسمانی عێراق لە مووشەک و فڕۆکە بێ فڕۆکەوانەکان لەرێگەی دانانی سیستەمی دژە مووشەک.
پارتی داوا لە لایەنە سیاسییەکانی عێراق دەکات هاوهەڵوێست بن لە سەرکۆنەکردنی ئەو هێرشە بەردەوامەنەی دەکرێنە سەر هەولێر و ئاسایش و سەروەری عێراق پێشێل دەکەن. ئاماژە بەوەش کراوە، "بۆ هەموو لایەک روونبووەوە، ئامانجی هێرشەکانی ئێران، پێشێلکردنی سەروەری، تێکدانی ئاسایشی و سەقامگیری عێراق و هەرێمی کوردستانە و، هەوڵدانە بۆ تۆقاندنی خەڵکەکەی".
فراکسیۆنەکە داواش لە کۆمەڵگەی نێودەوڵەتیی و ئەنجوومەنی ئاسایش دەکات هەڵوێستێکی جددییان هەبێت بۆ ڕووبەڕووبوونەوەی هەڕەشەکانی ئێران بۆ سەر عێراق و ناوچەکە بە گشتی و بێ دەنگ نەمێنن.
ئەمە لە کاتێکدایە نزیکەی کاتژمێر 11:30ـی خولەکی شەوی دووشەممە، 15-01-2024، بە چەندین مووشەک و فڕۆکەی بێ فڕۆکەوان هێرشکرایە سەر ناوچەیەکی جیاوازی شاری هەولێر. دواتر سوپای پاسدارانی ئێران بەرپرسیارییەتی هێرشەکانی لە ئەستۆ گرت.
دواتر ئەنجوومەنی ئاسایشی هەرێمی کوردستان لە راگەیەندراوێکدا ئەوەی خستەڕوو: "کاتژمێر 11:30ـی شەوی 15 لەسەر 16ی کانوونی دووەمی 2024، سوپای پاسدارانی ئێران بە چەندین مووشەکی بالیستیکی چەند ناوچەیەکی سڤیلنشینی هەولێری بۆردوومان کرد."
وەکو ئەوەی لە راگەیەندراوەکەی ئەنجوومەنی ئاسایشی هەرێمی کوردستاندا ئاماژەی پێ دراوە، بەهۆی هێرشەکەوە، "چوار هاووڵاتیی سڤیل شەهید و 6 کەسی دیکەش بریندار بوون، کە ڕەوشی تەندروستیی هەندێ لە بریندارەکان ناجێگیرە".
لای خۆیەوە، مەسرور بارزانی، سەرۆکوەزیرانی هەرێمی کوردستان لە پۆستێکی تۆڕی کۆمەڵایەتیی ئێکس (تویتەری پێشوو)، داوای لە حکومەتی فیدراڵی کرد "هەڵوێستی توندیان بەرامبەر بەم پێشێلکارییەی دەکرێتە سەر سەروەریی عێراق و بەتایبەتی هەرێمی کوردستان هەبێت".
سەرۆکوەزیرانی هەرێمی کوردستان هەروەها داوا لە کۆمەڵگەی نێودەوڵەتی دەکات "لەسەر ئەو ستەمکارییەی بەرامبەر بە خەڵکی کوردستان دەکرێت بێنە دەنگ". گوتیشی، "لە رۆژانی داهاتوودا، لەگەڵ کۆمەڵگەی نێودەوڵەتی لە پەیوەندیی بەردەوامدا دەبین لەپێناو کۆتاییهێنان بەم هێرشە دڕندانانەی دەکرێنە سەر خەڵکی بێ تاوانی کوردستان".