سەرۆکی حکومەتی هەرێمی کوردستان سەردانی هاوژین و منداڵە بریندارەکانی شەهید پێشڕەو دزەیی دەکات
K24 – هەولێر:
سەرۆکی حکومەتی هەرێمی کوردستان لە دوبەی سەردانی هاوژین و منداڵە بریندارەکانی شەهید پێشڕەو دزەیی دەکات.
رۆژی دووشەممە (12ـی شوباتی 2024) مەسرور بارزانی، سەرۆکی حکومەتی هەرێمی کوردستان لە شاری دوبەی، سەردانی هاوژین و منداڵە بریندارەکانی شەهید پێشڕەو دزەیی کرد کە لە رووداوی هێرشە مووشەکییەکەی هەولێر بریندار ببوون.
سەرۆکوەزیران مەسرور بارزانی لە نزیکەوە لە تەندروستی پرسین و هیوای چاکبوونەوەی خێرای بۆ خواستن.
ئەم سەردانەی سەرۆکی حکومەتی هەرێمی کوردستان بۆ لای هاوژین و منداڵە بریندارەکانی شەهید پێشڕەو دزەیی لە پەراوێزی سەردانەکەی دێت بۆ وڵاتی ئیمارات بە مەبەستی بەشداریکردن لە لوتکەی جیهانیی حکومەتەکان، لە کاتێکدا هاوژین و منداڵە بریندارەکانی شەهید پێشڕەو دزەیی بۆ وەرگرتنی چارەسەری پزیشکی لەو وڵاتەن.
درەنگانی شەوی دووشەممە (15ـی کانوونی دووەمی 2024) بە مووشەکی بالیستی هێرش کرایە سەر هەولێر و هاووڵاتییانی سڤیلی کردە ئامانج، لە ئەنجامدا چوار هاووڵاتی شەهید بوون و شەش کەسی دیکەش برینداربوون کە یەکێک لە شەهیدەکان منداڵێکی ساوای شیرەخۆرەیە.
دواتر سوپای پاسدارانی ئێران بەرپرسیاریەتی هێرشەکە لە ئەستۆ گرت و پاساوەی ئەو تاوانەشی بۆ بە ئامانجگرتنی بارەگای مۆسادی ئیسرائیلی گەڕاندەوە، کە هەر زوو ئەم تۆمەتەش لەلایەن حکومەتی هەرێمی کوردستان و ئەنجوومەنی ئاسایشی هەرێمی کوردستان رەتکرایەوە و دوای سەردانیکردنی شوێنی هێرشەکە و برینداران، قاسم ئەعرەجی، راوێژکاری ئاسایشی نیشتمانی عێراق، کە سەرۆکی لیژنەی لێکۆڵینەوەی حکومەتی عێراقە لە هێرشە مووشەکییەکانی سەر هەولێر، بە کوردستان24ی راگەیاند: "ئەو شوێنەی کراوەتە ئامانج ماڵی هاووڵاتییەکی مەدەنییە و بوونی بنکەی سیخوڕی ئیسرائیلی نەبووە".
کاردانەوەکانی ئەم هێرشە لەسەر ئاستی نێوخۆی هەرێمی کوردستان لەلایەن سەرجەم لایەنە سیاسییەکان و چین و توێژە جیاوازەکانەوە ئیدانە کرا و هێرشەکەی ئێران بە تاوانێکی بێ پاساو و بێ بنەما وەسفکرا، تەنانەت لەسەر ئاستی جەماوەری داوای بایکۆتکردنی کڕینی کاڵای ئێرانی و پچڕاندنی پەیوەندییە بازرگانییەکان لەگەڵ ئەو وڵاتە کرا.