ئەمەریکا هاوخەمیی خۆی بۆ سووتانی بازاڕی قەیسەری هەولێر دەردەبڕی
K24- هەولێر
کونسوڵخانەی گشتیی ئەمەریکا هاوخەمیی بۆ ئەوانە دەردەبڕی کە بەهۆی ئاگر کەوتنەوە لە بازاڕی قەیسەری هەولێر زیانیان بەرکەوت.
ئەمڕۆ دووشەممە(6ی ئایاری 2024)، کونسوڵخانەی گشتیی ئەمەریکا هاوخەمی نیشانداوە بۆ ئەوانەی بەهۆی ئاگرکەوتنە لە بازاڕی قەیسەری هەولێرنزیک لە قەڵای مێژووی هەولێر زیانیان بەرکەوتووە و ئاگرەکەی بە کارەساتبار وەسف کردووە.
کونسوڵخانەی گشتیی ئەمەریکا، ئومێدی زوو چاکبوونەوەی بۆ بریندارەکانی رووداوی ئاگرکەوتنەوەی بازاڕی قەیسەری خواستووە، هەروەها دەستخۆشی لە تیمەکانی بەرگریی شارستانیی و تیمەکانی تەندروستی کردووە کە بە هەوڵەکانیان توانیویانە زیانی ئاگر کەوتنەوەکە کەم بکەنەوە.
شەوی ڕابردوو ئاگر لە بازاڕی قەیسەریی هەولێر کەوتەوە، بە هەوڵی تیمەکانی بەرگریی شارستانی و هێزە ئەمنییەکان توانرا ئاگرەکە کۆنترۆڵ بکرێت، بەگوێرەی دوایین ئامارەکان لە ئاگرکەوتنەوەکەدا 228 دوکان و 7 کۆگای کاسبکارانی بازاڕەکە سووتاون.
بە گوێرەی زانیارییەکانی کوردستان24 بۆ کۆنترۆڵکردنی ئاگرەکە 30 تیمی بەرگری شارستانیی سەنتەری شاری هەولێر و دەوروبەری بەشدار بوون.