حزبوڵڵا کوژرانی سەرکردەیەکی پشتڕاست کردەوە
ئەمڕۆ چوارشەممە، 31ـی تەمموزی 2024، حزبوڵڵای لوبنان لە بەیاننامەیەکدا ڕایگەیاند، دوێنێ سێشەممە، ئیسرائیل هێرشی کردە سەر گەڕەکی باشووری بەیرووت و باڵەخانەیەکی نیشتەجێبوون و یەکێک لە سەرکردەکانی کردە ئامانج و بووە هۆی کوژارنی ژمارەیەک هاووڵاتی و برینداربوونی ژمارەیەکی دیکە و وێران بوونی باڵەخانەکەش.
لە بەیاننامەکەدا هاتووە، لە ئەنجامی ئەو هێرشەدا فواد شوکر (حەج موحسن) سەرکردەی دیاری حزبوڵڵا، لەنێو ئەو باڵەخانەدابووە کوژراوە.
ئاماژەی بەوەش دا، تیمەکانی بەرگری شارستانی بەردەوامن، لە گەڕان و لابردنی داروپەردووی باڵەخانە وێرانبووەکە بۆ دەرهێنانی ئەو کەسانەی کە لە ژیاندا ماون.
لەلایەن خۆیەوە، سوپای ئیسرائیل دوێنێ ڕایگەیاند: ئامانجی هێرشەکەیان لە بەیرووت کوشتنی کەسی دووەمی حزبوڵڵا بووە بەناوی فوئاد شوکر، کە ڕاوێژکاری سەربازی حەسەن نەسروڵڵڵایە و بەرپرسی یەکەمی چەندان هێرش بووە بۆ سەر ئیسرائیل کە دوایینیان هێرشەکەی مەجدەل شەمس لە بەرزاییەکانی جۆڵان بووە.
هاوکات مێدیاکانی ئیسرائیل ئاشکرایان کردووە: دوای هێرشەکەی باشووری بەیرووت، سوپای ئیسرائیل خراوەتە ئامادەباشییەوە بۆ وەڵامدانەوەی هەر ئەگەرێکی وەڵامدانەوەی حزبوڵڵا بۆ ئەو هێرشە.
بەهۆی پەرەسەندنە نوێیەکانی نێوان ئیسرائیل و حزبوڵڵای لوبنانی، چەند ڕۆژێکە وڵاتانی ئەمەریکا و ئەورووپا داوا لە هاووڵاتییانیان دەکەن بە زووترین کات لوبنان جێبهێڵن یان ئامادەکاری بکەن بۆ مانەوە بۆ کاتێکی زۆر لە شوێنەکانی خۆیان.